Azərbaycan Respublikasının Prezidenti “Ümumi təhsil haqqında” Qanunda edilmiş dəyişikliklərin tətbiqi ilə bağlı Fərman imzalayıb. Fərman 2025-ci il 23 dekabr tarixli qanunun icrasını təmin etmək və bu sahədə səlahiyyət bölgüsünü dəqiqləşdirmək məqsədi daşıyır.
Sənədə əsasən, “Ümumi təhsil haqqında” Qanunun 27.4-cü maddəsində nəzərdə tutulmuş bir sıra səlahiyyətlər Prezidentə, Nazirlər Kabinetinə və Elm və Təhsil Nazirliyinə həvalə olunub. Müəllimlərin işə qəbulu ilə bağlı müsabiqə prosesinə dair müəyyən qərarların qəbul edilməsi Prezidentin səlahiyyətinə aid edilib.
Fərmana uyğun olaraq, Nazirlər Kabinetinə müəllimlərin işə qəbulu müsabiqəsində iştirak üçün ödəniş məbləğinin üç ay müddətində təsdiqlənməsi və bu barədə Prezidentə məlumat verilməsi tapşırılıb. Eyni zamanda, qanundan irəli gələn digər məsələlərin həlli də hökumətin üzərinə düşür.
Bundan başqa, 2019-cu ildə “Ümumi təhsil haqqında” Qanunun tətbiqi ilə bağlı imzalanmış Prezident fərmanına dəyişikliklər edilib və müvafiq maddələr yeni qanunvericilik tələblərinə uyğunlaşdırılıb.
