ABŞ prezidenti Donald Tramp İranla bağlı gərgin vəziyyət səbəbindən Çinə planlaşdırılan rəsmi səfərini təxirə salmaq istəyib. ABŞ lideri bu ayın sonunda keçirilməsi nəzərdə tutulan Pekin sammitinin tarixinin dəyişdirilməsi üçün Çin rəhbərliyinə müraciət edib.
Məlumata görə, Tramp bazar ertəsi Çin lideri Sin Cinpin ilə planlaşdırılan görüşün daha gec tarixə keçirilməsini xahiş edib. ABŞ prezidenti bildirib ki, ölkəsi müharibə vəziyyətində olduğu bir vaxtda Pekinə səfər etməyin uyğun olmadığını hesab edir.
Planlaşdırılan görüş mart ayının son həftəsində baş tutmalı idi və bu səfər Trampın 2017-ci ildən sonra Çinə ilk rəsmi səfəri olacaqdı. ABŞ tərəfi görüşün aprel ayına keçirilməsini təklif edib.
Çin Xarici İşlər Nazirliyi isə Vaşinqton və Pekinin səfərin tarixləri ilə bağlı danışıqları davam etdirdiyini açıqlayıb. Rəsmi Pekin iki ölkə arasında bu məsələ üzrə əlaqələrin davam etdiyini bildirib.
Analitiklər hesab edir ki, Yaxın Şərqdə artan gərginlik və İranla bağlı hərbi vəziyyət ABŞ administrasiyasının diplomatik gündəmini birbaşa təsir altına alır və bu səbəbdən yüksək səviyyəli beynəlxalq görüşlərin vaxtı dəyişdirilir.
