ABŞ Prezidenti Donald Tramp ilə Rusiya Prezidenti Vladimir Putin arasında əldə olunan dizel yanacağı razılaşması Moskvaya təxminən 6,7 milyard dollar ümumi satış gəliri gətirə bilər. Bu, Almaniyanın “BILD” nəşrinin açıqladığı hesablamalarda əksini tapıb.
MSNews.az xəbər verir ki, “BILD” nəşrinin məlumatına görə, razılaşma çərçivəsində Rusiyanın bir neçə ay ərzində ABŞ-a 4,8 milyon tona qədər dizel yanacağı tədarük etməsi nəzərdə tutulur. Oktyabr ayında ilkin olaraq 300 min ton yanacağın bazara çıxarılması planlaşdırılır.
Nəşrin hesablamalarına əsasən, Rusiya nəzərdə tutulan 4,8 milyon ton dizeli tonuna təxminən 1400 dollardan sata bilsə, ümumi satış gəliri 6,7 milyard dollara çata bilər.
Bununla belə, bu məbləğ Rusiyanın dövlət büdcəsinə və ya hərbi xərclərinə birbaşa daxil olacaq vəsait deyil. Faktiki gəlir satış qiymətlərindən, tədarük həcmlərindən, əməliyyat xərclərindən və vergi ödənişlərindən asılı olacaq.
Münhendə yerləşən ifo İqtisadi Tədqiqatlar İnstitutunun prezidenti Klemens Fuest razılaşmanın ABŞ-da yanacaq qiymətlərini əhəmiyyətli dərəcədə aşağı salacağına şübhə ilə yanaşıb. O, Ukraynanın zərbələri nəticəsində Rusiyanın bir sıra neft emalı zavodlarının zədələndiyini xatırladaraq Moskvanın vəd edilən həcmdə yanacaq tədarük edə biləcəyini də sual altına alıb.
Fuestin fikrincə, razılaşma tam həyata keçirilərsə, Rusiyanın iqtisadi imkanlarını gücləndirə, Ukraynanın isə mövqeyini zəiflədə bilər.
“Reuters” agentliyinin məlumatına görə, Tramp oktyabrın 9-da Putinlə danışıqlardan sonra Rusiyanın dünya bazarına əlavə dizel yanacağı çıxaracağını açıqlayıb. ABŞ administrasiyası bu məqsədlə Rusiya yanacağına tətbiq edilən bəzi sanksiyaları müvəqqəti yumşaldıb.
Ukrayna Prezidenti Volodimir Zelenski qərarı tənqid edərək Rusiya neft məhsullarının satışına icazə verilməsinin Moskvanın müharibəni maliyyələşdirməsinə kömək edə biləcəyini bildirib.
Bununla yanaşı, “Financial Times”nəşrinin istinad etdiyi ekspertlər razılaşmanın Rusiya federal büdcəsinə altı ay ərzində təxminən 100 milyon dollar əlavə gəlir gətirə biləcəyini qiymətləndirirlər. Bu hesablamalar göstərir ki, 6,7 milyard dollarlıq potensial satış dövriyyəsi ilə dövlət büdcəsinin əldə edəcəyi gəlir arasında ciddi fərq var.
