ABŞ prezidenti Donald Tramp İranla mümkün razılaşmanın yalnız Tehranın nüvə silahından imtina etməsi halında baş tuta biləcəyini bildirib. Tramp “Axios”a müsahibəsində Vaşinqtonun İranla bağlı dəniz blokadasını nüvə proqramına dair razılaşma əldə olunana qədər davam etdirəcəyini deyib. Onun sözlərinə görə, İran “nüvə silahına sahib ola bilməz” və Tehran bu şərti qəbul etməsə, saziş mümkün olmayacaq.
Tramp blokadanı hərbi zərbələrlə müqayisədə “müəyyən dərəcədə daha effektiv” adlandırıb. ABŞ prezidenti iddia edib ki, İran blokadanın aradan qaldırılması üçün Vaşinqtonla razılığa gəlmək istəyir. O, həmçinin İranın neft anbarları və boru kəmərlərinin ixrac məhdudiyyətləri səbəbindən ciddi təzyiq altında olduğunu bildirib. Bununla belə, “Axios” bəzi analitiklərin İranın neft infrastrukturunun yaxın zamanda belə bir təhlükə ilə üzləşdiyinə şübhə etdiyini qeyd edir.
Məsələyə Tehrandan da sərt reaksiya gəlib. İranın ingilisdilli dövlət mediası “Press TV”-yə danışan yüksək rütbəli təhlükəsizlik mənbəsi ABŞ-ın dəniz blokadasının “praktiki və görünməmiş addımlarla” cavablandırıla biləcəyini bildirib. Mənbə qeyd edib ki, İran silahlı qüvvələri diplomatiyaya imkan yaratmaq üçün indiyədək təmkin nümayiş etdirib, lakin blokada davam edərsə, cavab tədbirləri gündəmə gələ bilər.
İran parlamentinin spikeri Məhəmməd Baqir Qalibaf isə ABŞ maliyyə naziri Skott Bessenti tənqid edib. Qalibaf “X” hesabında ABŞ administrasiyasının blokada strategiyasının qlobal neft qiymətlərini 120 dollardan yuxarı qaldırdığını, növbəti mərhələdə qiymətin 140 dollara çata biləcəyini yazıb. O, Trampın İran neft infrastrukturu ilə bağlı xəbərdarlıqlarını da istehza ilə qarşılayaraq “üç gün keçib, hələ bir dənə də quyu partlamayıb” ifadəsini işlədib.
Beləliklə, Vaşinqton və Tehran arasında gərginlik yenidən nüvə proqramı, enerji bazarı və Hörmüz boğazı ətrafında cəmlənib. ABŞ blokadanı İranı danışıqlara məcbur etmək üçün əsas təzyiq aləti kimi təqdim edir, Tehran isə bunu qanunsuz addım sayaraq cavab tədbirləri ilə hədələyir.
