Donald Tramp ABŞ ilə İran arasında baş verən hərbi qarşıdurmanın uzun çəkməyəcəyini bildirib. ABŞ prezidenti Mayamidə Respublikaçı Partiyanın Konqres üzvlərinin illik toplantısında çıxış edərkən müharibənin “qısa müddətli” olacağını vurğulayıb.
Tramp çıxışında qeyd edib ki, İranla qarşıdurma planlaşdırılandan daha sürətlə inkişaf edir və hərbi məqsədlərin böyük hissəsi artıq həyata keçirilib. Onun sözlərinə görə, bu əməliyyat “qısa bir səfər” kimidir və çox tez başa çatacaq.
ABŞ prezidenti həmçinin bildirib ki, Vaşinqton və İsrail İranın nüvə və raket imkanlarını ciddi şəkildə zəiflədib. Trampın iddiasına görə, İranın pilotsuz uçuş aparatları, raket potensialı və dəniz qüvvələrinin böyük hissəsi məhv edilib, onlarla hərbi gəmi batırılıb.
O əlavə edib ki, ABŞ və İsrail əvvəlcədən zərbə endirməsəydi, İranın qısa müddət ərzində hücuma keçməsi ehtimalı yüksək idi. Trampın sözlərinə görə, bu addımın məqsədi regiondakı təhlükəni tam aradan qaldırmaqdır.
ABŞ prezidenti, eyni zamanda, İranın Körfəz regionunda bəzi ölkələrə hücumlarını tənqid edərək bunun həmin dövlətlərin Vaşinqtona daha yaxın mövqe tutmasına səbəb olduğunu iddia edib.
Tramp bildirib ki, hərbi əməliyyatlar tezliklə başa çata bilər. O, jurnalistlərin müharibənin bir həftə ərzində sona çata biləcəyi ilə bağlı sualına “mümkündür, çox yaxın zamanda” cavabını verib.
