ABŞ prezidenti Donald Tramp İranda davam edən etirazlarla bağlı açıqlamasında ölkədə edamların dayandırıldığı barədə Vaşinqtona məlumat daxil olduğunu bildirib.
Ağ Evdə prezident sərəncamlarının imzalanması mərasimi zamanı çıxış edən Tramp deyib ki, hazırda İranda hər hansı edam planı və ya icrası yoxdur. Onun sözlərinə görə, belə bir hal baş verərsə, bunun hamı üçün üzücü olacağını vurğulayan Tramp, ona çatan məlumatlara əsasən edamların dayandırıldığını və İran tərəfinin edam həyata keçirməyəcəyini qeyd edib. ABŞ prezidenti, eyni zamanda, İranda etirazçılar arasında ölüm halları ilə bağlı məsul şəxslər tərəfindən araşdırma aparılacağını da açıqlayıb.
Xatırladaq ki, İranda etirazlar 28 dekabr 2025-ci ildə milli valyutanın xarici valyutalar qarşısında kəskin dəyər itirməsi və ağır iqtisadi vəziyyət fonunda Tehranın Böyük Bazarında ticarətçilərin aksiyaları ilə başlayıb və qısa müddətdə ölkənin bir çox şəhərinə yayılıb.
İran İnsan Haqları Aktivistləri Xəbər Agentliyinin (HRANA) 14 yanvar tarixli hesabatına əsasən, etirazlar zamanı ölənlərin sayı 147-si təhlükəsizlik əməkdaşı olmaqla ümumilikdə 2 min 550 nəfərə çatıb. İran rəsmiləri isə indiyədək etirazlar zamanı ölən və ya yaralananlarla bağlı rəsmi statistika açıqlamayıb. Qeyd olunur ki, zorakılıq hallarının və polis müdaxiləsinin artması fonunda 9 yanvar tarixində ölkə üzrə internet bağlantısı kəsilib.
