MSNews.az xəbər verir ki, “StatusGator” monitorinq platformasında “TikTok” istifadəçiləri tətbiqin açılmaması, videoların yüklənməməsi və internet bağlantısı ilə bağlı problemlərdən şikayət ediblər.
Şikayətlər arasında Bakıdan göndərilən müraciətlər də var. Bəzi istifadəçilər tətbiqin həm Wi-Fi, həm də mobil internet üzərindən işləmədiyini bildiriblər.
“Instagram” ilə bağlı da oxşar müraciətlər qeydə alınıb. “StatusGator” platformasında Azərbaycandan olan istifadəçi “Instagram” və “Facebook” xidmətlərinə girişdə problem yaşadığını bildirib. Digər ölkələrdən isə səhifələrin yavaş açılması və məzmunun görünməməsi barədə məlumatlar daxil olub.
Bununla belə, hər iki sosial şəbəkədə qlobal miqyasda genişmiqyaslı nasazlıq baş verdiyi təsdiqlənməyib. Monitorinq xidmətləri “TikTok” və “Meta” platformalarının ümumi fəaliyyətini normal qiymətləndirir.
Problemlərin səbəbi, istifadəçilərin hansı hissəsinə təsir etdiyi və tam aradan qaldırılma vaxtı hələlik məlum deyil. “TikTok” və “Instagram” rəhbərliyindən bu şikayətlərlə əlaqədar ayrıca rəsmi açıqlama müəyyən edilməyib.
