ABŞ-nin Texas ştatında AH-64 “Apache” hücum helikopterinin qəzaya uğraması nəticəsində iki hərbçi həlak olub. Hadisə avqustun 12-də Salado yaşayış məntəqəsi yaxınlığında baş verib.
MSNews.az xəbər verir ki, “Reuters”in məlumatına görə, Fort Hud hərbi bazasına məxsus helikopter Bell dairəsində, Texasın paytaxtı Ostindən təxminən 100 kilometr şimalda yerləşən əkin sahəsinə düşüb. ABŞ Ordusu göyərtədəki hər iki hərbçinin öldüyünü təsdiqləyib.
“Associated Press”in hərbi mənbəyə istinadən məlumatına görə, AH-64 “Apache” qəza zamanı adi təlim uçuşu həyata keçirirdi. Qəzanın səbəbi hələ açıqlanmayıb və araşdırma davam edir.
Helikopterin yerə çırpılması nəticəsində ərazidə geniş otlaq yanğını başlayıb. Yanğın səbəbindən yaxınlıqdakı bir neçə ev ehtiyat tədbiri olaraq təxliyə edilib. Rəsmilər helikopterin yaşayış evlərinə və digər tikililərə dəymədiyini bildiriblər.
Həlak olan hərbçilərin adları ailələrinə məlumat verilməsinədək açıqlanmayıb. Texas qubernatoru Qreq Ebbott hadisə ilə bağlı başsağlığı verərək hərbçilərin xidmətini və fədakarlığını qeyd edib.
