Bakının mərkəzində, “Tarqovu” kimi tanınan ərazidə yerləşən binada yanğın baş verib.
MSNews.az xəbər verir ki, hadisə Səbail rayonunun Yusif Məmmədəliyev küçəsində qeydə alınıb. Fövqəladə Hallar Nazirliyindən verilən məlumata görə, yanğın barədə məlumat daxil olduqdan sonra Dövlət Yanğından Mühafizə Xidmətinin qüvvələri əraziyə cəlb edilib.
FHN-in Mətbuat xidmətinin açıqlamasında bildirilib ki, əməliyyata Xüsusi Riskli Xilasetmə Xidmətinin qüvvələri də cəlb olunub. Təhlükəsizlik tədbirləri çərçivəsində binadakı vətəndaşlar FHN əməkdaşları tərəfindən təhlükəsiz əraziyə təxliyə ediliblər.
Hadisə yerində yanğınsöndürmə tədbirləri davam etdirilir. Yanğının başvermə səbəbi, dəymiş ziyanın miqyası və xəsarət alanların olub-olmaması barədə hələlik rəsmi məlumat açıqlanmayıb.
