İsrailin maliyyə naziri Bezalel Smotriç ABŞ-İran razılaşması fonunda Vaşinqtonla Tel-Əviv arasında ciddi fikir ayrılıqlarının olduğunu etiraf edib.
MSNews.az xəbər verir ki, Smotriç bu barədə İsrailin “Channel 14” kanalında yayımlanan “Patriots” proqramında danışıb.
İsrailli nazir bildirib ki, ölkəsi Livandan geri çəkilmək niyyətində deyil. Onun sözlərinə görə, İsrail ordusu Livanın cənubunda hərəkət azadlığını qoruyacaq və “Hizbullah” tərksilah olunmadığı müddətdə bölgədə qalacaq.
“Channel 14”un məlumatına görə, Smotriç İranın İsrailin cümə gününə qədər Livandan çıxması ilə bağlı tələblərinə cavab olaraq “geri çəkilmə olmayacaq” mesajı verib. O, İsrailin Livanda “tam hərəkət azadlığını” saxlayacağını bildirib.
Smotriç ABŞ prezidenti Donald Tramp administrasiyasının İranla əldə etdiyi razılaşmanı da tənqid edib. “Israel National News” yazır ki, nazir bu sazişi İsrail və “azad dünya” üçün pis razılaşma adlandırıb.
Onun sözlərinə görə, İsrail İran rejimini zəiflədib, nüvə proqramına və iqtisadiyyatına ciddi zərbə vurub, lakin hədəflərin hamısı tam yerinə yetirilməyib. Smotriç bildirib ki, İsrail “daha çoxunu etmək istəyirdi” və kampaniyanı davam etdirmək niyyətində idi.
Nazir eyni zamanda ABŞ-la fikir ayrılıqlarının açıq olduğunu deyib. “Channel 14”un məlumatına görə, Smotriç bildirib ki, hazırda İsrail və ABŞ arasında “real fikir ayrılıqları” var, lakin əsas çağırış mövqedən geri çəkilmədən bu böhranı idarə etməkdir.
Smotriç bildirib ki, ABŞ prezidenti öz ölkəsinin maraqlarını, İsrail isə öz maraqlarını qoruyur. Onun fikrincə, İsrail Vaşinqtonla münasibətləri qoparmadan, lakin əsas təhlükəsizlik mövqelərindən də imtina etmədən hərəkət etməlidir.
“Times of Israel”in məlumatına görə, Smotriç İran rejiminin devrilməsi üçün İsrailin səyləri davam etdirməli olduğunu bildirib. O, Tehranın nüvə silahı əldə etməsinə imkan verilməməli olduğunu vurğulayıb.
Nazir Livanın cənubu ilə bağlı da sərt mövqe nümayiş etdirib. O bildirib ki, İsrail bölgədə uzunmüddətli təhlükəsizlik zonası saxlamalı və “Hizbullah”ın yenidən sərhədə qayıtmasına imkan verməməlidir.
“Reuters” isə yazır ki, “Hizbullah” İranın ABŞ-la yekun nüvə razılaşmasını İsrail qoşunlarının Livandan çıxması ilə əlaqələndirə biləcəyini düşünür. İranın xarici işlər naziri Abbas Əraqçi də İsrailin Livandakı hərbi mövcudluğunu ABŞ-İran anlaşmasının pozulması kimi qiymətləndirə biləcəklərini bildirib.
Smotriç Qəzza ilə bağlı da mövqeyini açıqlayıb. O bildirib ki, Qəzza “xarabalığa çevrilib” və demilitarizasiya olmadan bərpa olmayacaq. Nazir HƏMAS-ın məhv edilməli olduğunu deyib və Qəzzada gələcəkdə yəhudi məskunlaşmasının bərpa olunmasını dəstəkləyib.
“Reuters”in daha əvvəlki məlumatına görə, İsrail Baş naziri Binyamin Netanyahu orduya Qəzza zolağında nəzarəti 70 faizə qədər genişləndirmək göstərişi verdiyini açıqlamışdı. Reuters yazır ki, həmin vaxt İsrail qüvvələrinin Qəzzanın təxminən 64 faizinə faktiki nəzarət etdiyi bildirilirdi.
Smotriçin son açıqlamaları ABŞ-İran razılaşması fonunda İsrail hökumətində narazılığın artdığını və Tel-Əvivin Livan, İran və Qəzza üzrə daha sərt xətt tutmaq istədiyini göstərir.
