Ermənistanın Milli Assambleyasının spikeri Alen Simonyan ölkəsinin Rusiya Federasiyası ilə münasibətləri “boşanma” məntiqi ilə qiymətləndirmədiyini bildirib. Jurnalistlərlə söhbətində o qeyd edib ki, Ermənistanın Rusiya ilə əlaqələri tamamilə kəsmək və ya qarşıdurma yaratmaq məqsədi yoxdur.
MSNews.az xəbəri “Armenia News” nəşrinə istinadən verir.
Simonyan bildirib ki, Moskvanın Ermənistanla bağlı mövqeyi bəzən ziddiyyətli görünür. Onun sözlərinə görə, Rusiya tərəfi bir yandan Ermənistanın onlar üçün əhəmiyyətli olmadığını göstərməyə çalışır, digər tərəfdən isə ölkənin daxili və xarici siyasət məsələlərinə fəal münasibət bildirir.
“Əgər biz onlara lazım deyiliksə, onda niyə bu qədər müdaxilə edirlər? Hər yerdə deyirlər ki, Rusiyada Ermənistandan daha çox erməni yaşayır, Ermənistan ümumiyyətlə Rusiya olmasaydı, dövlət olmazdı. Əgər biz onlara bu qədər lazım deyiliksə, onda indi nədən danışırıq?” — deyə Simonyan vurğulayıb.
Parlament spikeri tərəflər arasında fikir ayrılıqlarının siyasi dialoq çərçivəsində həll edilməli olduğunu deyib. O, mövcud vəziyyəti “bir stəkan suda fırtına qoparmaq” kimi qiymətləndirməyə ehtiyac olmadığını bildirib.
“Bu siyasətdir. Onlar öz mövqelərini bildirəcəklər, biz də öz mövqeyimizi deyəcəyik. Sonra oturub müzakirə edəcəyik, danışacağıq. Onlar bir təklif verəcəklər, biz başqa təklif verəcəyik”, — deyə Simonyan qeyd edib.
Simonyanın sözlərinə görə, Ermənistan-Rusiya münasibətləri “nikah və qəyyumluq” məsələsi deyil. O bildirib ki, Ermənistanın hazırda “aliment tələb etmək” və ya “uşaqları bölmək” kimi bir məqsədi yoxdur və İrəvan bu cür ritorikanın əleyhinədir.
