Türkiyə Futbol Federasiyası (TFF) milli komandanın baş məşqçisi vəzifəsi üçün Sergen Yalçınla razılığa gəlib. Təcrübəli mütəxəssisin Vinçenso Montellanı əvəzləyəcəyi və yaxın saatlarda təyinatının rəsmən açıqlanacağı bildirilir.
MSNews.az xəbər verir ki, bu barədə Türkiyənin “Habertürk” telekanalı oktyabrın 19-da məlumat yayıb. Nəşrin məlumatına əsasən, TFF rəhbərliyi Sergen Yalçınla razılıq əldə edib.
Federasiyanın İdarə Heyətinin oktyabrın 20-də keçirəcəyi iclasdan sonra təcrübəli mütəxəssisin adının rəsmən elan olunması gözlənilir.
Qeyd edək ki, Türkiyə Futbol Federasiyası oktyabrın 10-da yaydığı rəsmi açıqlamada italiyalı mütəxəssis Vinçenso Montella ilə əməkdaşlığın başa çatdırıldığını elan edib.
Qərar Türkiyə millisinin UEFA Millətlər Liqasında ardıcıl dörd məğlubiyyət almasından sonra qəbul olunub. Montella 2023-cü ilin sentyabrından milli komandaya rəhbərlik edirdi.
Sergen Yalçın isə daha əvvəl İstanbulun “Beşiktaş” klubunu çalışdırıb. O, 2020/2021 mövsümündə komanda ilə Türkiyə çempionluğunu və ölkə kubokunu qazanıb.
