Kriştianu Ronaldunun keçmiş şəxsi aşpazı Corcio Barone portuqaliyalı ulduzun qidalanma rejimi ilə bağlı maraqlı detalları bölüşüb.
“Goal” və “AS USA”-nın “Covers.com”-a istinadla yaydığı məlumata görə, Ronaldu qidalanmasında şəkəri tamamilə çıxarıb, hətta qəhvəsinə belə nə şəkər, nə də süd əlavə etmir. Barone bildirib ki, futbolçunun menyusunda fastfud, çörək, makaron və digər un məmulatları da yer almır.
Keçmiş aşpazın sözlərinə görə, Ronaldunun gündəlik rejimi çox sadə, amma son dərəcə intizamlıdır. Səhər yeməyində adətən avokado, qəhvə və yumurta olur. Nahar daha çox toyuq, balıq və tərəvəzdən ibarətdir. Axşam isə yüngül menyuya üstünlük verilir: balıq və ya ət filesi tərəvəzlə birlikdə təqdim olunur. Barone əlavə edib ki, Ronaldu karbohidrat ehtiyacını əsasən tərəvəz vasitəsilə qarşılayır və bu səbəbdən unlu qidalara ehtiyac duymur.
Baronenin ən diqqətçəkən açıqlamalarından biri də süd barədə olub. Onun dediyinə görə, Ronaldu böyüklərin süd içməsini “təbiətə zidd” hesab edir və süd məhsullarından uzaq durur. Aşpaz bu fikri “Covers.com” müsahibəsində birbaşa sitatla ifadə edib, “Goal” da həmin sitatı ayrıca qabardıb.
Matç öncəsi qidalanma ilə bağlı detal da maraq doğurub. Barone bildirib ki, komandalar adətən oyun günündə futbolçular üçün xüsusi səhər və nahar menyusu hazırlasa da, Ronaldu matçdan əvvəl yemək yeməməyi üstün tuturdu. Onun fikrincə, həzm prosesi bədəni yavaşlada bilər. Eyni müsahibədə aşpaz deyib ki, Ronaldu zülal, yağ və karbohidratı ayrıca hesablamır; sadəcə çox məşq etdiyi üçün çox yeyirdi.
