Britaniyanın mühəndislik və aviasiya nəhəngi “Rolls-Royce Holdings” bu həftə açıqlayacağı illik maliyyə nəticələri ilə birlikdə səhmlərin geri alınması (buyback) proqramına start verə bilər. “Sky News”un məlumatına görə, proqramın həcmi 1,5 milyard funt sterlinqə — təxminən 2 milyard ABŞ dollarına qədər çata bilər.
“Rolls-Royce” ötən ilin iyul ayında yarımillik nəticələrini açıqlayarkən illik mənfəət proqnozunu yüksəltmişdi. Şirkət əməliyyat mənfəətinin yuxarı həddini 300 milyon funt artıraraq 3,2 milyard funt səviyyəsinə, sərbəst pul axını proqnozunu isə 200 milyon funt artıraraq 3,1 milyard funta çatdırmışdı.
Qeyd edək ki, “Rolls-Royce” ötən il də maliyyə nəticələrini açıqladığı dövrdə 1 milyard funt sterlinqlik səhmlərin geri alınması proqramı həyata keçirmişdi. Analitiklər yeni “buyback” qərarını şirkətin maliyyə mövqeyinin möhkəmlənməsi və səhmdarlar üçün dəyərin artırılması kimi qiymətləndirirlər.
