“Mançester Siti”nin baş məşqçisi Pep Qvardiolanın mövsümün sonunda klubu tərk edəcəyi bildirilir. Britaniya mediası yazır ki, ispaniyalı mütəxəssisin “Aston Villa”ya qarşı Premyer Liqanın son tur matçı “Siti”dəki son oyunu ola bilər. Hələlik “Mançester Siti” xəbərlə bağlı rəsmi açıqlama verməyib.
Qvardiolanın klubla hazırkı müqaviləsi 2027-ci ilin iyununadək qüvvədədir. Buna baxmayaraq, yayılan xəbərlərdə onun müqavilə müddətinin bitməsinə bir il qalmış ayrılacağı iddia olunur. Qvardiola FA Kuboku finalından sonra gələcəyi ilə bağlı suallara konkret cavab verməyib və mövzunu şərh etməkdən yayınıb.
55 yaşlı mütəxəssis 2016-cı ildə “Mançester Siti”nin baş məşqçisi təyin olunub və klub tarixinin ən uğurlu dövrünü formalaşdırıb. Onun rəhbərliyi altında “Siti” Premyer Liqa, Çempionlar Liqası, FA Kuboku, Liqa Kuboku, UEFA Superkuboku və Klublararası Dünya Kuboku daxil olmaqla çoxsaylı titullar qazanıb. Bu mövsüm FA Kubokundakı qələbə Qvardiolanın “Mançester Siti”dəki 20-ci kuboku olub.
Britaniya mediasında Qvardiolanın mümkün varisi kimi Enso Mareskanın adı çəkilir. Mareska daha əvvəl “Mançester Siti” sistemində çalışıb, Qvardiolanın köməkçisi olub və klubun gənclər komandasında da fəaliyyət göstərib. O, hazırda ispaniyalı mütəxəssisi əvəz etmək üçün əsas namizədlərdən biri sayılır.
Qvardiolanın mümkün ayrılığı İngiltərə futbolunda bir eranın sonu kimi qiymətləndirilir. “Mançester Siti” onun rəhbərliyi altında təkcə titul sayına görə deyil, oyun fəlsəfəsi, topa nəzarət modeli və taktiki dominantlığı ilə də Avropa futbolunun əsas güclərindən birinə çevrilib.
