İlham Əliyev uşaqların rəqəmsal mühitdə zərərli məzmun və təsirlərdən qorunması ilə bağlı tədbirləri nəzərdə tutan Sərəncam imzalayıb. Sənəd 27 fevral 2026-cı il tarixində təsdiqlənib və sosial şəbəkələrin uşaqların gündəlik həyatında artan rolunun yaratdığı risklərin azaldılmasına yönəlib.
Sərəncamda qeyd olunur ki, rəqəmsal texnologiyaların sürətli inkişafı və sosial şəbəkələrin erkən yaşlardan istifadəsi mövcud hüquqi mexanizmlərin yenidən qiymətləndirilməsini zəruri edir. Beynəlxalq təcrübəyə istinadla uşaqların psixoloji rifahının, şəxsi həyatının və təhlükəsizliyinin dövlət tərəfindən daha güclü hüquqi və texnoloji mexanizmlərlə qorunmasının vacibliyi vurğulanır.
Sənədə əsasən, Azərbaycan Respublikasının Nazirlər Kabinetinə üç ay müddətində uşaqların sosial şəbəkələrdə zərərli məzmun və təsirlərdən qorunmasını, o cümlədən qeydiyyat zamanı yaş məhdudiyyətlərinin tətbiqini nəzərdə tutan normativ hüquqi aktların layihələrinin hazırlanması tapşırılıb. Eyni zamanda məktəbəhazırlıq və ümumi təhsil müəssisələrində mobil və elektron cihazlardan istifadə qaydalarının müəyyən edilməsi, təhsil proqramlarına rəqəmsal savadlılıq, kibertəhlükəsizlik və məsuliyyətli onlayn davranış mövzularının daxil edilməsi nəzərdə tutulur.
Sərəncamda valideynlər, müəllimlər və uşaqlar üçün maarifləndirmə proqramlarının hazırlanması, sosial şəbəkələrdən qanunauyğun istifadə və uşaq hüquqlarının müdafiəsi istiqamətində mütəmadi tədbirlərin görülməsi, eləcə də uşaqların rəqəmsal rifahı ilə bağlı elmi tədqiqatların təşviqi də prioritet kimi müəyyən edilib.
Yeni sənəd uşaqların rəqəmsal mühitdə təhlükəsizliyinin təmin olunması ilə yanaşı, onların məsuliyyətli onlayn davranış bacarıqlarının formalaşdırılmasına və sağlam inkişafına xidmət edir.
