Azərbaycan Respublikasının Prezidenti İlham Əliyev dekabrın 30-da bir sıra mühüm sərəncamlar imzalayıb. Sərəncamlara əsasən tanınmış ictimai-siyasi xadimlər dövlət təltiflərinə layiq görülüb, həmçinin Azərbaycan memarlığının görkəmli nümayəndəsi Əcəmi Naxçıvaninin 900 illik yubileyinin qeyd olunması ilə bağlı qərar qəbul edilib.
Prezidentin Sərəncamı ilə Azərbaycan Respublikasının ictimai-siyasi həyatında uzunmüddətli səmərəli fəaliyyətinə görə Rasim Nəsrəddin oğlu Musabəyov “Şərəf” ordeni ilə, Həsən Sultan oğlu Zeynalov isə 1-ci dərəcəli “Vətənə xidmətə görə” ordeni ilə təltif edilib.
Eyni gün imzalanan digər sərəncamla 2026-cı ildə böyük Azərbaycan memarı, Naxçıvan memarlıq məktəbinin banisi Əcəmi Əbubəkr oğlu Naxçıvaninin 900 illik yubileyinin qeyd edilməsi qərara alınıb. Sənəddə vurğulanır ki, Əcəmi Naxçıvani XII əsr Azərbaycan memarlığına yeni üslub və estetik yanaşma gətirmiş, Möminə xatun məqbərəsi və Yusif ibn Küseyir türbəsi kimi möhtəşəm abidələrlə dünya memarlıq irsinə əvəzsiz töhfə vermişdir.
Sərəncama əsasən, Azərbaycan Respublikasının Mədəniyyət Nazirliyi Azərbaycan Milli Elmlər Akademiyası ilə birlikdə yubileyə dair tədbirlər planı hazırlayıb həyata keçirməli, Nazirlər Kabineti isə sənəddən irəli gələn məsələləri təmin etməlidir. Əcəmi Naxçıvaninin 900 illik yubileyinin UNESCO çərçivəsində qeyd olunması Azərbaycan mədəni irsinin beynəlxalq miqyasda tanıdılması baxımından mühüm əhəmiyyət daşıyır.
