Pakistan və Hindistan yeni ilin ilk günündə qarşılıqlı etimad mexanizmləri çərçivəsində bir-birinə nüvə obyektlərinin siyahısını və mülki məhbuslar barədə məlumatları təqdim edib. Məsələ ilə bağlı İslamabad və Yeni Dehli rəsmiləri tərəfindən açıqlamalar yayılıb.
Hindistan Xarici İşlər Nazirliyinin bildirdiyinə görə, 2008-ci ildə iki ölkə arasında imzalanmış müvafiq razılaşmaya əsasən, yanvarın 1-də eyni vaxtda Yeni Dehlidə və İslamabadda nüvə obyektləri və mülki məhbusların siyahıları dəyişdirilib. Bu çərçivədə Hindistan öz ərazisində saxlanılan Pakistan mənşəli 391 mülki məhbusun və 33 balıqçının adlarını Pakistan tərəfinə təqdim edib.
Pakistan Xarici İşlər Nazirliyinin sözçüsü Tahir Hüseyn Andrabinin keçirdiyi mətbuat konfransında Hindistanın açıqlamasını təsdiqlədiyi bildirilib. O qeyd edib ki, Pakistan hökuməti də bu gün Hindistana 199 balıqçı və 58 mülki şəxs daxil olmaqla, ümumilikdə 257 Hindistan vətəndaşının adlarını təqdim edib.
Andrabi həmçinin vurğulayıb ki, iki ölkə arasında imzalanmış və nüvə obyektlərinə zərbələrin endirilməsini qadağan edən sazişə uyğun olaraq, tərəflər nüvə təsisatlarının siyahılarını da qarşılıqlı şəkildə paylaşıblar. Bu addım regionda gərginliyin davam etdiyi bir dövrdə tərəflər arasında mövcud olan razılaşmaların icrasının davam etdiyini göstərir.
