Korrupsiya ilə Mübarizə Fondu (FBK) Rusiyanın “Ozon” marketpleysinin ən böyük səhm paketinin alınmasının milyarder və Vladimir Putinin yaxın dostu Gennadi Timçenkoya bağlı vəsaitlər hesabına maliyyələşdirildiyini iddia edib.
MSNews.az xəbər verir ki, “FBK” avqustun 27-də dərc etdiyi araşdırmada şirkətlər və onların maliyyə hesabatları arasındakı əməliyyatları təhlil edərək pulun “Delta”dan “Optima”, oradan isə Aleksandr Çaçavanın strukturları ilə əlaqələndirilən şirkətlərə ötürüldüyü qənaətinə gəlib. Fond Rusiyada ekstremist təşkilat kimi tanınıb və ləğv edilib.
Araşdırmaya görə, “Stratosfera” investisiya qrupu 2024-cü ildə 51 milyard 230 milyon 297 min rubl məbləğində borc alıb. FBK maliyyə hesabatlarının müqayisəsi əsasında eyni məbləğin “Optima” şirkəti tərəfindən verildiyini, “Optima”nın isə təxminən həmin həcmdə vəsaiti Gennadi Timçenkoya məxsus “Delta” şirkətindən faizsiz borc kimi aldığını bildirir. “The Bell” də açıq maliyyə hesabatlarına istinadən bu əməliyyat zəncirini təsvir edib.
Sözügedən paket əvvəllər “Baring Vostok”-un aktivləri sırasında olub. “RBC” məlumatına görə, fondun aktivlərini qəbul edən “Vostok İnvestitsii” 2024-cü ildə Ozon-un 27,713%-lik paketini 38,2 milyard rubla satıb. 2025-ci ildə bu payın “O23” şirkəti vasitəsilə Aleksandr Çaçavanın strukturlarına keçdiyi açıqlanıb.
Sonradan Çaçavanın strukturları şirkətdəki iştirakını artırıb. “Interfax” Ozon-un maliyyə hesabatına istinadən bildirib ki, 2026-cı il martın 1-nə “O23”ün payı 34,95%-ə çatıb. Bununla da Çaçavanın strukturları 31,8%-lik paya malik AFK “Sistema”nı geridə qoyaraq Ozon-un ən böyük səhmdarına çevrilib.
FBK Timçenkonu Putinin maliyyə maraqlarını idarə edən şəxslərdən biri kimi təqdim edir və bu sistemi “Putin obşakı” adlandırır. Fond daha əvvəl Timçenkoya bağlı strukturları Gelencikdəki sarayın, eləcə də Putinin ailəsi ilə əlaqələndirdiyi müxtəlif xərclərin maliyyələşdirilməsi ilə bağlayıb. “Meduza” da araşdırmanın bu iddialarını yayımlayıb.
Bununla belə, “Ozon”-dakı səhm paketinin faktiki olaraq Vladimir Putinə məxsus olması və ya vəsaitlərin onun şəxsi pulları olması barədə FBK-nın nəticələri müstəqil və rəsmi mənbələr tərəfindən təsdiqlənməyib. Təsdiqlənən məlumatlar “O23”ün “Ozon”-da 34,95%-lik paya sahib olması, Aleksandr Çaçavanın həmin strukturun benefisiarı kimi göstərilməsi və FBK-nın araşdırmasında istinad etdiyi şirkətlərin hesabatlarında 51,2 milyard rubla yaxın borc əməliyyatlarının əks olunmasıdır.
