ABŞ Prezidenti Donald Tramp üçün Ağ Evin Oval kabinetində keçirilən dua mərasimində diqqət çəkən qadının kimliyi məlum olub. Sosial şəbəkələrdə geniş yayılan fotoda Trampın yanında dayanaraq onun üçün dua edən qadının amerikalı yevangelist din xadimi Paula Uayt olduğu açıqlanıb.
Paula Uayt ABŞ-da televiziya vaizi, pastor və dini fəaliyyətləri ilə tanınan fiqurlardan biridir. O, uzun illərdir Donald Trampın yaxın dini məsləhətçilərindən biri hesab olunur və prezidentlə şəxsi münasibətləri ilə də tanınır.
Uayt Trampın əvvəlki prezidentlik dövründə Ağ Evdə fəaliyyət göstərən “Faith and Opportunity Initiative” adlı proqramın əsas simalarından biri olub. Bu təşəbbüs hökumət ilə dini təşkilatlar arasında əməkdaşlığı gücləndirmək məqsədilə yaradılmışdı.
Oval kabinetdə çəkilən və sosial mediada sürətlə yayılan fotoda Paula Uaytın Trampın çiyninə əl qoyaraq dua etdiyi görünür. Mərasimdə iştirak edən din xadimləri ABŞ prezidentinin qarşılaşdığı çətinliklərdə doğru qərarlar verməsi və ölkəni idarə etmək üçün güc əldə etməsi üçün dua ediblər.
Qeyd edək ki, dua mərasiminin görüntüləri ABŞ və İsrailin İrana qarşı həyata keçirdiyi hərbi əməliyyatların davam etdiyi bir dövrdə yayıldığı üçün sosial mediada və siyasi mühitdə geniş müzakirələrə səbəb olub.
