Türkiyədə aparılan genişmiqyaslı narkotik istintaqı çərçivəsində tanınmış aktyor Oktay Kaynarca və müğənni Emel Müftüoğlu ilə bağlı məhkəmə qərarı açıqlanıb. İstanbul Respublika Baş Prokurorluğunun rəhbərliyi ilə həyata keçirilən istintaq çərçivəsində bir sıra tanınmış şəxslər barəsində hüquqi tədbirlər görülüb.
İstanbulda keçirilən əməliyyatlar nəticəsində aralarında Oktay Kaynarca və Emel Müftüoğlunun da olduğu 6 nəfər saxlanılıb. Şübhəlilər ifadələrinin alınması üçün Çağlayan Ədliyyəsinə aparılıb. Prokurorluq Kaynarca və Müftüoğlu barəsində ev dustaqlığı tədbirinin seçilməsini tələb etsə də, məhkəmə bu vəsatəti rədd edib. Məhkəmənin qərarına əsasən hər iki şəxs barəsində ölkədən çıxışa qadağa qoyulmaqla məhkəmə nəzarəti tədbiri tətbiq edilib.
İstintaq çərçivəsində saxlanılan digər şəxslərdən Ali Sert və Rabia Karataşın isə həbs edildiyi bildirilib. İstintaq materiallarında şübhəlilərə şəxsi istifadə məqsədilə narkotik və ya psixotrop maddə saxlamaq, narkotik maddə istifadəsini asanlaşdırmaq, fahişəliyə təşviq etmək, fahişəliyə vasitəçilik etmək və qumar üçün yer və şərait yaratmaq kimi bir və ya bir neçə maddə üzrə ittihamların irəli sürüldüyü qeyd olunur.
Hazırda iş üzrə istintaq tədbirləri davam etdirilir və proses ictimaiyyətin diqqət mərkəzindədir.
