Prezident İlham Əliyev Natiq Səhrab oğlu İbrahimovun Lənkəran Dövlət Universitetinin rektoru təyin edilməsi haqqında sərəncam imzalayıb.
Bu qərarla Natiq İbrahimov eyni vəzifəyə yenidən təyin olunmuş olur. Lənkəran Dövlət Universitetinin rəsmi profil məlumatında qeyd edilir ki, o, 2016-cı ilin mayından 2021-ci ilin 23 aprelədək rektor vəzifəsini icra edib, daha sonra isə 23 aprel 2021-ci ildə universitetin rektoru təyin olunub.
Natiq İbrahimov 1953-cü il 28 martda Qəbələ rayonunun Mıxlıqovaq kəndində anadan olub. O, Azərbaycan Dövlət Universitetinin (indiki Bakı Dövlət Universiteti) mexanika-riyaziyyat fakültəsində təhsil alıb, müxtəlif illərdə həm BDU-da, həm də Təhsil Nazirliyi sistemində çalışıb. 1997-ci ildən fizika-riyaziyyat elmləri namizədi, 2015-ci ildən isə riyaziyyat üzrə elmlər doktorudur. 2011-ci ildə “Azərbaycan Respublikasının Əməkdar müəllimi” fəxri adına layiq görülüb.
LDU-nun rəsmi məlumatında həmçinin bildirilir ki, Natiq İbrahimovun rəhbərliyi dövründə universitetdə idarəetmə və tədris islahatları aparılıb, maddi-texniki bazanın yenilənməsi, şəffaflıq və hesabatlılıq tədbirləri, eləcə də xarici universitetlərlə əməkdaşlığın genişləndirilməsi istiqamətində işlər görülüb.
