Myanmada hərbi rəhbərliyə yaxın Birlik Həmrəyliyi və İnkişaf Partiyası (USDP) ümumi seçkilərin ilk mərhələsində liderliyə yüksəlib. Dövlət mediasının yayımladığı ilkin nəticələrə görə, bu səsvermə 2021-ci il hərbi çevrilişindən sonra keçirilən ilk seçkidir və ölkədə dərin siyasi qarşıdurma fonunda baş tutur.
Demokratiya tərəfdarı etirazların sərt şəkildə yatırılmasından sonra ölkə boyu silahlı üsyanlara səbəb olan hakim xunta seçkilərin üç mərhələdə keçiriləcəyini və bunun siyasi sabitlik yaradacağını bəyan edib. Lakin nəticələr və iştirak səviyyəsi bu iddialara şübhə ilə yanaşılmasına səbəb olub.
Mərkəzi Seçki Komissiyasının 56 seçki dairəsi üzrə qismən açıqladığı nəticələrə əsasən, istefada olan generalların rəhbərlik etdiyi USDP Aşağı Palatada (Pyithu Hluttaw) 40 yerdən 38-ni qazanıb. Şan Milliyyətləri Demokratik Partiyası (Ağ Pələng Partiyası kimi tanınır) və Mon Birlik Partiyası isə hərəsi bir mandat əldə edib. Ordu tərəfindən seçilmiş və xeyli məhdudlaşdırılmış siyasi mühitdə USDP eyni zamanda regional və ştat məclislərində də üstünlük qazanaraq 15 yerdən 14-nü götürüb. Qalan bir yer Akha Milli İnkişaf Partiyasına çatıb.
Yuxarı Palata (Amyotha Hluttaw) üzrə isə indiyədək yalnız bir yerin nəticəsi açıqlanıb və həmin mandatı Wa Milli Partiyası qazanıb. Seçkilərin yekun nəticələrinin nə vaxt elan ediləcəyi hələlik bildirilməyib. Birləşmiş Millətlər Təşkilatı, bir sıra Qərb ölkələri və insan haqları təşkilatları bu seçkiləri kəskin tənqid edir; çünki anti-xunta mövqeli partiyalar yarışdan kənarlaşdırılıb və səsverməni tənqid etmək qanunla qadağandır.
Xunta çərşənbə günü açıqlayıb ki, ilk mərhələdə seçici fəallığı 52% olub. Bu göstərici 2020 və 2015-ci illərdə keçirilən ümumi seçkilərdə qeydə alınmış təxminən 70%-lik iştirakçılıqdan xeyli aşağıdır. Seçki komissiyası ilk mərhələdə səsvermənin keçirildiyi dairələrin ümumi sayını açıqlamayıb və nəticələri dairə-dairə təqdim etməyi seçib.
Səsvermənin daha iki mərhələsinin 11 və 25 yanvar tarixlərində keçirilməsi planlaşdırılır və bu mərhələlər Myanmanın 330 qəsəbəsindən 265-ni əhatə edəcək. Lakin bu ərazilərin bir qismətində xuntanın tam nəzarəti yoxdur.
2020-ci il seçkilərində böyük qələbə qazandıqdan aylar sonra hərbi çevrilişlə devrilən Nobel Sülh Mükafatı laureatı Aunq San Su Çji hələ də həbsdə saxlanılır. Onun rəhbərlik etdiyi Milli Demokratiya Liqası isə ləğv edilib. Analitiklərin fikrincə, davam edən müharibə şəraitində xuntanın mülki görüntü altında sabit hökumət formalaşdırmaq cəhdi ciddi risklər daşıyır və belə bir idarəçiliyin beynəlxalq tanınma qazanması ehtimalı aşağıdır.
