Moldova Müstəqil Dövlətlər Birliyinin əsas sənədlərindən çıxışı rəsmiləşdirib. Parlament 2 aprel tarixində MDB-nin yaradılması haqqında sazişin, ona əlavə protokolun və Nizamnamənin denonsasiyasını təsdiqləyib, prezident Maia Sandu isə bu qərarları imzalayıb; sənədlər 8 aprel tarixində rəsmi nəşrdə dərc olunaraq qüvvəyə minib.
Amma vacib bir hüquqi detal var: bu addım Moldovanın “artıq tam çıxıb” deməsi ilə eyni deyil. “Reuters” və digər açıq mənbələrə görə, yekun çıxış üçün Kişinyovun MDB İcraiyyə Komitəsinə rəsmi bildiriş göndərməsi lazımdır və bundan sonra 12 aylıq müddət işləyir. MDB rəsmiləri də aprelin əvvəlində belə bir rəsmi notanın hələ daxil olmadığını bildirmişdilər.
Moldova hökuməti bildirir ki, bu qərar ölkənin Avropa inteqrasiyası kursuna uyğundur və Rusiyanın Gürcüstan, Ukrayna və Moldova ilə bağlı addımları MDB-nin əsas prinsiplərini sarsıdıb. Eyni zamanda, rəsmi Kişinyov vurğulayır ki, iqtisadi fayda verən bəzi sazişlər hələlik qüvvədə qala bilər və vətəndaşların hərəkət azadlığına təsir gözlənilmir.
