İngiltərənin Suffolk bölgəsində yerləşən HMP Highpoint həbsxanasında çalışan 46 yaşlı nəzarətçi Rebekka Pinkardın bir məhkumla depo otağında cinsi əlaqədə olduğu görüntülər bədən kamerası ilə üzə çıxıb.
Hadisə 2024-cü ilin iyulunda baş verib və daha sonra daxili yoxlamalar zamanı Pinkardın 9 aprel–6 iyul tarixləri arasında məhkum Erion Nakdi ilə davamlı və qadağan olunmuş əlaqə saxladığı müəyyən olunub.
Kembric Krallıq Məhkəməsində təqdim edilən materiallarda Pinkardın məhkumla tək qalaraq fiziki yaxınlıq yaşadığı, bu anların üzərindəki xidməti kamera tərəfindən qeydə alındığı bildirilib. Hadisə başqa bir həbsxana əməkdaşının depo otağına daxil olması ilə aşkar olunub. Nakdinin ağır narkotik ticarəti cinayətinə görə uzunmüddətli həbs cəzası çəkdiyi məhkəmədə vurğulanıb.
Araşdırma zamanı məlum olub ki, Pinkard məhkuma gizli şəkildə emosional dəstək mesajları və kartlar göndərib, onun tərəfindən göndərilən açıq məzmunlu görüntüləri rəhbərliyə bildirməyib və daha əvvəl də bəzi məhkumlarla peşə sərhədlərini aşan davranışlara görə xəbərdarlıq alıb. Hakim bu münasibətin təsadüfi deyil, davamlı xarakter daşıdığını qeyd edərək Pinkardı vəzifə səlahiyyətindən sui-istifadədə təqsirli bilib və 32 həftə həbs cəzasına məhkum edib.
Erion Nakdi də həbsxanada qanunsuz mobil telefon saxladığını etiraf edib və mövcud cəzasına əlavə olaraq 10 ay daha həbs alıb. O, 2022-ci ildə “A” sinif narkotiklərin dövriyyəsinə görə 16 ildən artıq müddətə azadlıqdan məhrum edilmişdi.
Təxminən 1300 məhkumun saxlanıldığı HMP Highpoint ölkənin ən iri həbsxanalarından biri sayılır və bu hadisə İngiltərədə penitensiar müəssisələrdə nəzarət mexanizmlərinin yetərliyi ilə bağlı ciddi müzakirələrə səbəb olub.
