Fransa Prezidenti Emmanuel Makron ölkədə genişmiqyaslı etiraz aksiyalarının zorakılıq və qarətlərlə müşayiət olunmasından sonra xalqa müraciət edib. Dövlət başçısı baş verənləri qətiyyətlə pisləyərək iğtişaşlarda iştirak edən şəxslərin məsuliyyətə cəlb olunacağını bildirib.
MSNews.az xəbər verir ki, Makron oktyabrın 18-də Yelisey sarayından televiziya vasitəsilə yayımlanan müraciətində ölkədə yaranmış vəziyyəti ciddi böhran kimi qiymətləndirib. Fransa Prezidentinin çıxışı oktyabrın 17-də müxtəlif şəhərlərdə baş vermiş qarşıdurmalardan sonra səsləndirilib.
Bu barədə “TF1 Info” və “AFP” məlumat yayıb.
“Bu axşam hamımız qəzəb və xəcalət hissi keçiririk”, – deyə Makron bildirib.
Fransa lideri nümayişlər zamanı mağazaların qarət edilməsini, dövlət binalarına hücumları və ictimai əmlakın dağıdılmasını qəbuledilməz adlandırıb.
O, hüquq-mühafizə orqanlarına və məhkəmə sisteminə müraciət edərək zorakılıq törədən şəxslərin qanun qarşısında cavab verməsinin vacibliyini vurğulayıb.
Makron dinc nümayişçilərlə iğtişaş törədən şəxslərin fərqləndirilməli olduğunu da qeyd edib.
“Biz qanuni tələblərlə küçələrə çıxan insanları dağıntı və qarətlə məşğul olanlarla qarışdırmamalıyıq”, – deyə Prezident bildirib.
Fransa dövlət başçısı vətəndaşların yaşayış xərclərinin və yanacaq qiymətlərinin artmasından narazılığını başa düşdüyünü vurğulayıb.
O, enerji qiymətlərindəki artımı Yaxın Şərqdə, xüsusilə Fars körfəzi ətrafında davam edən hərbi qarşıdurmanın nəticələri ilə əlaqələndirib. Makron Fransanın həmin müharibədə birbaşa iştirak etmədiyini, lakin iqtisadi fəsadlarını hiss etdiyini bildirib.
Makron həmçinin təhsil sistemindəki problemlərə və gənclərin gələcəklə bağlı narahatlıqlarına toxunaraq onların tələblərinin diqqətlə dinlənilməli olduğunu bildirib.
Bununla belə, dövlət başçısı zorakılığa qarşı güzəşt edilməyəcəyini vurğulayıb.
“TF1 Info” telekanalının məlumatına görə, Makron bölgələrdə təhlükəsizliyin təmin edilməsi üçün prefektlərə zəruri tədbirlər görmək, ehtiyac yaranarsa, müəyyən toplantıları qadağan etmək səlahiyyətinin tətbiq olunacağını bildirib.
