Şansın, yoxsa riyazi hesablamanın gücü? Lotoreyada qalib gəlmək ehtimalını artırdığı iddia edilən “Çin üsulu” yenidən gündəmə gəlib. Bu üsul, keçmişdə rumın riyaziyyatçı Stefan Mandel tərəfindən hazırlanmış və lotoreyanı 14 dəfə qazanmaq üçün istifadə edilmiş xüsusi bir formula ilə oxşarlıqlar daşıyır.
Böyük uduş qazanmaq ehtimalı demək olar ki, yüz mində birdir, amma insanlar şanslarını artırmaq üçün dualar, rituallar və bir neçə bilet alma kimi yolları sınayır. “Çin üsulu” isə bu yanaşmadan fərqli olaraq, riyaziyyat və ehtimal əsaslı strategiya təqdim edir. Bu metodda, oynanan rəqəmlərin ümumi mükafata nisbəti ətraflı analiz edilir və yatırılan məbləğin optimallaşdırılması ilə qazanma ehtimalı artırılır.
Stefan Mandel, 1950-ci illərdə Rumıniyada öz hazırladığı ehtimal formulu ilə Avstraliyada 12, ABŞ-da isə 30 milyon dollarlıq böyük bir uduş qazanıb. Onun bu uğuru o qədər diqqət çəkib ki, Mərkəzi Kəşfiyyat İdarəsi və Federal Təhqiqatlar Bürosu onun fəaliyyətini izləməyə başlayıb. Nəticədə lotoreya qaydalarında dəyişikliklər edilib və Mandel müəyyən müddət həbs və cərimə ilə cəzalandırılıb. Hal-hazırda o, Sakit okeanda yerləşən Vanuatu adasında var-dövlətinin dadını çıxardığı güman edilir.
Həm “Çin üsulu”, həm də Mandelin formulu göstərir ki, lotoreya kimi mürəkkəb oyunlarda uğur yalnız inanc və şansa deyil, dərin riyazi analiz və strategiyaya da bağlıdır. Lakin hər iki üsulda da mütləq qələbə zəmanəti yoxdur, yəni risk hər zaman mövcuddur.
