“Liverpul” “Barselona”nın uruqvaylı müdafiəçisi Ronald Arauxonu 2026/27 mövsümü üçün icarəyə götürüb. İngiltərə və İspaniya klubları transferi avqustun 10-da rəsmən açıqlayıblar. İcarə müqaviləsi 30 iyun 2027-ci ilədək qüvvədə olacaq.
MSNews.az xəbər verir ki, 27 yaşlı futbolçunun keçidi iş icazəsinin alınması və beynəlxalq qeydiyyat prosedurlarının tamamlanmasından sonra rəsmiləşəcək. Arauxo artıq “Liverpul”un bazasında olub, ilk məşqini keçirib və komandada 33 nömrəli formanı geyinəcək.
“Reuters” Britaniya mediasına istinadən yazır ki, razılaşmada “Liverpul”un müdafiəçini təxminən 47 milyon funt sterlinqə — 55 milyon avroya yaxın məbləğə birdəfəlik transfer etmək hüququ da nəzərdə tutulub. Bununla belə, nə “Liverpul”, nə də “Barselona” rəsmi açıqlamasında satınalma məbləğini göstərib.
Arauxonun transferi “Liverpul”un müdafiə xəttində ciddi itkilərlə üzləşdiyi vaxta təsadüf edir. “The Guardian” yazır ki, Co Qomez, Covanni Leoni və Jeremi Jake zədə səbəbindən komandadan kənarda qalıb. Uruqvaylı futbolçu həm mərkəz müdafiəçisi, həm də sağ cinah müdafiəçisi kimi çıxış edə bilir.
Arauxo “Barselona”ya 2018-ci ildə qoşulub və klubun əsas komandasında 200-dən çox oyun keçirib. O, Kataloniya təmsilçisi ilə üç dəfə La Liqa, iki dəfə İspaniya Kuboku və üç dəfə İspaniya Superkubokunun qalibi olub.
