ABŞ Prezidenti Donald Trampın kürəkəni və nümayəndəsi Cared Kuşner Qəzza ilə bağlı danışıqları davam etdirmək üçün gələn həftə İsrail və Misirə səfər etməyi planlaşdırır. Bu, Kuşnerin yanvar ayından sonra İsrailə ilk səfəri olacaq.
MSNews.az xəbər verir ki, “Axios” planla tanış beş mənbəyə istinadən Kuşnerin İsrailin Baş naziri Benyamin Netanyahu və digər yüksək vəzifəli rəsmilərlə görüşəcəyini yazıb. Onu Qəzza üzrə “Sülh Şurası”nın yüksək nümayəndəsi Nikolay Mladenovun müşayiət etməsi gözlənilir.
ABŞ rəsmisinin sözlərinə görə, Vaşinqton və İsrail strateji məqsədlər üzrə ümumi mövqedə olsalar da, İsrail Amerika planının müəyyən elementlərinə şübhə ilə yanaşır. Səfərin məqsədlərindən biri növbəti addımları Netanyahu hökuməti ilə koordinasiya etməkdir. Səfərin dəqiq tarixlərinin dəyişə biləcəyi də qeyd olunur.
ABŞ-ın Qəzza planının növbəti mərhələsi HƏMAS-ın tərksilahı, Qəzzada mülki və təhlükəsizlik idarəçiliyinin yeni Fələstin texnokrat hökumətinə ötürülməsi və mümkün İsrail geriçəkilməsini əhatə edir. Netanyahu hökuməti isə planın bəzi müddəalarına açıq şəkildə şübhə bildirib.
Kuşnerin Misirdə Qəzza üzrə vasitəçilik edən Misir, Qətər və Türkiyə nümayəndələri ilə də görüşməsi nəzərdə tutulur. Ağ Ev İsraildə oktyabrda keçiriləcək seçkilərin planın növbəti mərhələsinin icrasını ləngitməməsinə çalışır.
