Kreml Ukrayna Prezidenti Volodimir Zelenskinin Moskvanın Qızıl meydanında 9 May paradının keçirilməsi ilə bağlı ironik fərmanını şərh edib. Rusiya Prezidentinin mətbuat katibi Dmitri Peskov bildirib ki, Rusiyanın Qələbə Gününü qeyd etməsi üçün “heç kimin icazəsinə ehtiyacı yoxdur”.
Zelenskinin 8 may tarixli 374/2026 nömrəli fərmanı Ukrayna Prezidentinin rəsmi saytında dərc olunub. Sənəddə 2026-cı il mayın 9-da Moskvada parad keçirilməsinə “icazə verildiyi” qeyd olunur. Fərmanda həmçinin parad müddətində Qızıl meydanın müəyyən koordinatlarının Ukrayna silahlarının tətbiq planından çıxarıldığı bildirilir.
Peskov bu addımı Qələbə Günü üzərindən istehza kimi qiymətləndirib. “Qələbə Günü ilə zarafat etməyə çalışanların vay halına. Bu, onun öz dərdidir. Bizə isə heç kimin icazəsi lazım deyil”, — deyə Kremlin sözçüsü bildirib.
Hadisə Rusiya və Ukrayna arasında 9 May ərəfəsində ritorikanın yenidən sərtləşdiyi vaxta təsadüf edib. Ukrayna tərəfi fərmanı ironik siyasi jest kimi təqdim edərkən, Moskva bunu “uğursuz zarafat” və Qələbə Gününə hörmətsizlik kimi dəyərləndirib.
