Musalia Mudavadi bildirib ki, Keniya və Rusiya arasında əldə olunan razılaşmaya əsasən, bundan sonra keniyalı vətəndaşlar Rusiyanın Ukraynadakı müharibəsində iştirak etmək üçün hərbi xidmətə cəlb olunmayacaqlar.
Bu barədə o, Moskvada Sergey Lavrov ilə keçirilən görüşdən sonra açıqlama verib.
Mudavadi qeyd edib ki, tərəflər Rusiyada yaşayan keniyalıların vəziyyətini və xüsusilə Ukraynada aparılan “xüsusi hərbi əməliyyat”da iştirak edən şəxslərlə bağlı məsələləri müzakirə ediblər. Onun sözlərinə görə, əldə olunan razılaşmaya əsasən keniyalılar artıq Rusiyanın Müdafiə Nazirliyi vasitəsilə hərbi xidmətə qəbul edilməyəcək.
“Biz razılaşdıq ki, keniyalı vətəndaşlar bundan sonra hərbi xidmətə cəlb olunmayacaq. Yeni hərbi çağırış olmayacaq,” – deyə Mudavadi bildirib.
O əlavə edib ki, Rusiyada olan keniyalı vətəndaşlara zəruri hallarda diplomatik və konsulluq dəstəyi göstəriləcək.
Mudavadi vurğulayıb ki, Keniya Moskva ilə münasibətlərin yalnız Ukrayna müharibəsi prizmasından qiymətləndirilməsini istəmir və iki ölkə arasında əməkdaşlıq daha geniş sahələri əhatə edir.
Öz növbəsində Lavrov bildirib ki, Rusiyanın tərəfində döyüşən keniyalılar könüllü şəkildə müqavilə bağlayıblar.
Bununla belə, Keniya parlamentinə təqdim edilən kəşfiyyat hesabatında Ukrayna müharibəsində Rusiyanın tərəfində döyüşmək üçün 1000-dən çox keniyalının cəlb olunduğu qeyd olunub. Bu rəqəm əvvəlki rəsmi qiymətləndirmələrdən təxminən beş dəfə çoxdur.
Keniyalı siyasətçilər isə bəzi dövlət məmurları ilə insan alveri şəbəkələri arasında əməkdaşlıq olduğunu və keniyalıların müharibəyə cəlb edilməsində bu strukturların rol oynadığını iddia edirlər. Nayrobi hökuməti bu praktikanı dayandırmaq niyyətində olduğunu bildirib.
