Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas mayın 5-də Azərbaycana səfərə gəlib. Bu barədə Aİ-nin Azərbaycandakı nümayəndəliyinə istinadən yerli media məlumat yayıb.
Kallas Bakıya səfəri çərçivəsində Azərbaycanın Avropa İttifaqı üçün “dəyərli və etibarlı enerji tərəfdaşı” olduğunu bildirib. Onun sözlərinə görə, tərəflər arasında əməkdaşlığın, xüsusilə ticarət, nəqliyyat və rəqəmsal sahələrdə dərinləşdirilməsi üçün aydın imkanlar mövcuddur.
Səfər çərçivəsində Azərbaycanın xarici işlər naziri Ceyhun Bayramov ilə Kaya Kallas arasında görüş keçirilib. Xarici İşlər Nazirliyinin məlumatına görə, görüşdə Azərbaycan–Aİ münasibətlərinin geniş spektri, siyasi dialoq, institusional əməkdaşlıq və tərəfdaşlıq gündəliyinin inkişaf perspektivləri müzakirə olunub.
Danışıqlarda enerji əməkdaşlığına xüsusi diqqət ayrılıb. Azərbaycanın Avropanın enerji təhlükəsizliyinə töhfə verən etibarlı təchizatçı kimi rolu, bərpa olunan enerji sahəsində əməkdaşlıq, həmçinin ticarət, investisiya, rəqəmsallaşma, innovasiya, nəqliyyat və logistika əlaqələri müzakirə edilib. Görüşdə Orta Dəhlizin inkişafı və regional infrastruktur layihələri də diqqət mərkəzində olub.
Tərəflər həmçinin regional və beynəlxalq təhlükəsizlik məsələləri, postmünaqişə dövründə görülən işlər, yenidənqurma və bərpa prosesi, humanitar minatəmizləmə, eləcə də Cənubi Qafqazda normallaşma səyləri barədə fikir mübadiləsi aparıblar. Aİ-nin rəsmi məlumatına görə, Kallasın səfər proqramında Prezident İlham Əliyev və xarici işlər naziri Ceyhun Bayramovla yüksək səviyyəli görüşlər nəzərdə tutulub.
