Rusiyalı iş adamı, “Güclü Ermənistan” blokunun lideri Samvel Karapetyan seçkilərdə qalib gələcəyi təqdirdə Ermənistanın Kollektiv Təhlükəsizlik Müqaviləsi Təşkilatından — KTMT-dən çıxması ehtimalını istisna etməyib. Ermənistan mediasının məlumatına görə, Karapetyan bildirib ki, hakimiyyətə gələcəyi halda əvvəlcə Ermənistanın KTMT və Rusiya ilə münasibətlərində yaranmış vəziyyətin səbəbləri araşdırılacaq.
Karapetyanın sözlərinə görə, əgər aparılacaq araşdırma KTMT-nin Ermənistan üçün faydasız və “mənasız” təşkilat olduğunu göstərsə, ölkənin qurumdan çıxması gündəmə gələ bilər. O deyib: “Biz bu prosesləri araşdıracağıq: niyə KTMT və Rusiya məhz bu cür davrandı. Əgər görsək ki, bu, ‘mənasız’ təşkilatdır, çıxacağıq”.
Bununla yanaşı, Karapetyan KTMT-dən çıxışın alternativ təhlükəsizlik zəmanətləri olmadan həyata keçirilməsini riskli saydığını bildirib. O qeyd edib ki, əgər Fransa Prezidenti Emmanuel Makron Ermənistanın bütün məsələlərdə təhlükəsizlik qarantı olacağına dair razılaşma imzalasa, buna yalnız müsbət yanaşar. Karapetyan eyni fikrin ABŞ üçün də keçərli olduğunu deyib.
Siyasətçi həmçinin Ermənistanın təhlükəsizlik məsələsində yalnız bəyanatlarla hərəkət etməməli olduğunu vurğulayıb. O, hazırkı hakimiyyəti KTMT-dən çıxmaq barədə illərdir danışmaqda, lakin bunu rəsmən etməməkdə tənqid edib. Karapetyanın fikrincə, əgər təşkilat həqiqətən Ermənistan üçün faydasızdırsa, hakimiyyət bunu bir imza ilə rəsmiləşdirməlidir, yox əgər etmirsə, bunun səbəbləri aydınlaşdırılmalıdır.
Ermənistanın KTMT ilə münasibətləri son illərdə ciddi şəkildə pisləşib. Baş nazir Nikol Paşinyan 2024-cü ilin fevralında Ermənistanın Rusiyanın rəhbərlik etdiyi KTMT-də iştirakını faktiki olaraq “dondurduğunu” açıqlamışdı. O, təşkilatın Ermənistanın təhlükəsizlik ehtiyaclarını qarşılamadığını bildirmişdi. Həmin açıqlamadan sonra Kreml İrəvandan izahat istəyəcəyini bəyan etmişdi.
