İsveçrənin Ticino kantonunda yerləşən Gottardo sanatoriyası 2,4 milyon İsveçrə frankı (təxminən 5.045.733AZN) başlanğıc qiymətilə hərraca çıxarılacaq. Quinto bölgəsinin yüksək hissəsində yerləşən bu tarixi bina Birinci Dünya Müharibəsi dövründə yaralı və xəstə əsgərlər üçün hərbi hospital kimi xidmət göstərib. Daha sonra isə uzun illər tuberkulyoz xəstələrinin müalicə olunduğu əsas səhiyyə mərkəzlərindən biri olub.
“Corriere del Ticino” qəzetinin məlumatına görə, 1962-ci ildən bəri istifadəsiz qalan bu sanatoriya ölkənin ən məşhur “tərk edilmiş məkanları” arasında yer alır.
Sanatoriya Birinci Dünya Müharibəsindən sonra “Sanatorio Popolare Cantonale di Piotta” adı ilə fəaliyyət göstərərək vərəm xəstələrinin müalicəsində mühüm rol oynayıb. Son xəstənin buradan 60 ildən çox əvvəl çıxdığı bildirilir və o vaxtdan bəri bina tamamilə boş vəziyyətdədir.
Son illərdə Gottardo sanatoriyası sosial şəbəkələrin təsiri ilə qlobal “Lost Place” (“Tərk edilmiş məkan”) fenomeninə çevrilib. Dünyanın müxtəlif ölkələrindən maraqlı şəxslər tərəfindən ziyarət olunan bu kimi yerlər — çürümüş hotellər, boşalmış əyləncə parkları və sahibsiz sənaye binaları — sosial mediada geniş maraq doğurur.
Sanatoriyaya giriş qadağan olmasına baxmayaraq, sosial şəbəkələrdə paylaşılan fotolar və videolar onun daxilindəki vəziyyəti nümayiş etdirir. Hətta burada icazəsiz əyləncə partilərinin keçirildiyi də məlumdur.
Binanın gələcəyi ilə bağlı illərdir müzakirə olunan plan mövcud idi. Qazaxıstanlı iş adamı Timur Azimov bu nəhəng strukturu təxminən doqquz il əvvəl 750 min İsveçrə frankına almış və onu qış idman növləri üzrə təlim mərkəzinə çevirməyi planlaşdırmışdı.
Lakin layihə baş tutmayıb. Prosesin arxasında duran “Ice Sport International SA” şirkətinin ləğv olunmasına başlanıldıqdan sonra sanatoriyanın gələcəyi qeyri-müəyyən vəziyyətə düşüb. İndi isə binanın taleyini müəyyən edəcək yeni sahib tapmaq üçün 2,4 milyon İsveçrə frankı başlanğıc qiymətilə hərrac keçirilməsi gözlənilir.
