İspaniya hökuməti ABŞ Prezidenti Donald Trampın ikitərəfli münasibətlərin kəsilməsi ilə bağlı açıqlamalarına cavab olaraq Vaşinqtonu beynəlxalq hüquqa hörmət etməyə çağırıb.
Madrid hökumət mənbələrinin yerli mətbuata verdiyi məlumata görə, İspaniya ABŞ da daxil olmaqla dünyanın 195 ölkəsi üçün etibarlı ticarət tərəfdaşıdır və iki ölkə arasında uzun illərdir qarşılıqlı faydalı iqtisadi əlaqələr mövcuddur. Bildirilib ki, əgər ABŞ administrasiyası bu münasibətləri yenidən nəzərdən keçirmək istəyirsə, bunu özəl şirkətlərin muxtariyyətinə, beynəlxalq hüquqa və Avropa İttifaqı ilə ABŞ arasında qüvvədə olan ikitərəfli razılaşmalara hörmət çərçivəsində etməlidir.
Ağ Evdə Almaniya Kansleri Fridrix Mers ilə görüşü zamanı danışan Tramp İranla bağlı hərbi əməliyyatlar kontekstində İspaniyanı tənqid etmişdi. O, Əndəlüs bölgəsindəki Moron de la Frontera və Rota hərbi bazalarından istifadə ilə bağlı Madridin mövqeyinə etiraz edərək, İspaniyanın “istəsələr belə ABŞ-nin bazalardan istifadəsinə mane ola bilməyəcəyini” iddia etmiş və maliyyə naziri Skott Bessentə İspaniya ilə bütün ticarət əlaqələrinin dayandırılması barədə göstəriş verdiyini söyləmişdi.
Koalisiya hökumətinin kiçik ortağı olan Sumar alyansının nümayəndələri Trampın açıqlamalarını sərt tənqid ediblər. Baş nazirin müavini, Əmək və Sosial İqtisadiyyat naziri Yolanda Dias sosial şəbəkə hesabında bildirib ki, İspaniya “aqressiv ölkədən gələn şantaj və ya təlimatları qəbul etməyəcək” və ABŞ müttəfiq olmaq istəyirsə, ilk növbədə İspaniyanın suverenliyinə və beynəlxalq hüquqa hörmət etməlidir.
Mədəniyyət naziri Ernest Urtasun isə Trampın bəyanatlarını “təhdid xarakterli” adlandıraraq onların təsirli olmayacağını qeyd edib. Sosial Hüquqlar naziri Pablo Bustinduy də ölkənin suverenliyinin müzakirə mövzusu ola bilməyəcəyini vurğulayıb.
Digər tərəfdən, İspaniya İşəgötürənlər Konfederasiyası (CEOE), Kiçik və Orta Müəssisələr Konfederasiyası (CEPYME) və Milli Özünüməşğullar Federasiyası (ATA) ABŞ-la ticarət münasibətlərinin pozula biləcəyi ehtimalından “dərin narahatlıq” ifadə ediblər. Onlar ABŞ-ı İspaniya üçün əsas iqtisadi və siyasi tərəfdaş kimi qiymətləndirərək, yaranmış vəziyyətin Avropa İttifaqı çərçivəsində koordinasiya olunmasının vacibliyini vurğulayıblar.
Baş nazir Pedro Sançesin də məsələ ilə bağlı Madriddəki Monkloa iqamətgahında açıqlama verəcəyi bildirilib.
Qeyd edək ki, ABŞ və İsrailin İrana qarşı hərbi əməliyyatları fonunda İspaniya hökuməti bazaların istifadəsinə icazə verməyərək ardıcıl şəkildə beynəlxalq hüquqa və dialoqa çağırış edib. Xarici işlər naziri Xose Manuel Albares isə Vaşinqton və Təl-Əvivin İrana qarşı hücumlarını BMT Nizamnaməsinə və çoxtərəflilik prinsipinə uyğun olmadığını bəyan edib.
