2027-ci il İspaniya Superkuboku 2-7 fevral tarixlərində İstanbulda keçiriləcək. Turnirdə “Barselona”, “Real Madrid”, “Atletiko Madrid” və “Real Sosyedad” mübarizə aparacaq.
MSNews.az xəbər verir ki, İspaniya Kral Futbol Federasiyası (RFEF) turnirin İstanbulun Atatürk Olimpiya Stadionunda təşkil olunacağını rəsmən açıqlayıb. İstanbul dörd komandalı hazırkı formatın tətbiqindən sonra ilk dəfə İspaniya Superkubokuna ev sahibliyi edəcək.
“Reuters” bildirir ki, turnirdə La Liqa çempionu “Barselona”, çempionatın ikincisi “Real Madrid”, İspaniya Kubokunun qalibi “Real Sosyedad” və finalçı “Atletiko Madrid” iştirak edəcək.
Yarımfinal cütlükləri də müəyyənləşib. “Real Madrid” “Real Sosyedad”la, “Barselona” isə “Atletiko Madrid”lə qarşılaşacaq. “Barselona”nın rəsmi saytı matçların dəqiq gün və başlama saatlarının hələ təsdiqlənmədiyini bildirir.
Turnirin 2027-ci ildə Səudiyyə Ərəbistanından Türkiyəyə keçirilməsinin əsas səbəbi həmin dövrdə Səudiyyə Ərəbistanında Asiya Kubokunun təşkil olunmasıdır. “El País” yazır ki, RFEF İstanbul da daxil olmaqla yeddi mümkün variantı nəzərdən keçirib. Superkubokun 2028-ci ildə yenidən Səudiyyə Ərəbistanına qayıtması gözlənilir.
“Barselona” hazırkı Superkubokun qalibidir və 2026-cı ilin finalında “Real Madrid”i məğlub edərək titulu qazanıb.
