İranın dünən müdafiə naziri vəzifəsinin icraçısı təyin edilən general Məcid ibn əl-Rza öldürülüb. Bu barədə SEPAH-la əlaqəli media orqanları məlumat yayıb. Məlumatı İsrailin “Channel 12″ telekanalı da təsdiqləyib.
İran Prezidenti administrasiyasının yaydığı açıqlamaya əsasən, general Məcid ibn əl-Rza bir gün əvvəl ölkənin müdafiə naziri vəzifəsinin icraçısı təyin olunmuşdu. Onun sələfi, müdafiə naziri Əziz Nəsirzadə isə 28 fevral tarixində – İsrail və ABŞ-ın İrana qarşı hərbi kampaniyasının başladığı ilk gündə həlak olmuşdu.
Beləliklə, İran Müdafiə Nazirliyində qısa müddət ərzində ikinci yüksək səviyyəli itki qeydə alınıb. Hadisənin detalları və generalın hansı şəraitdə öldürüldüyü barədə rəsmi Tehran hələlik geniş məlumat açıqlamayıb.
SEPAH-a yaxın media resursları məsələni “hədəfli əməliyyat” kimi təqdim edir. İsrail tərəfi isə rəsmi səviyyədə məsuliyyəti üzərinə götürməyib. Lakin regionda gərginliyin artdığı bir vaxtda İranın hərbi rəhbərliyinə ardıcıl zərbələr yeni təhlükəsizlik mərhələsinin başladığını göstərir.
Hazırda Tehranın mümkün cavab addımları və müdafiə strukturlarında növbəti təyinatların kimə həvalə olunacağı diqqət mərkəzindədir.
