Təşkilatların birgə bəyanatında bildirilib ki, yeni ittifaq “Koordinasiyalı Kürdistan Siyasi Qüvvələri Koalisiyası” adı altında fəaliyyət göstərəcək. Qeyd olunur ki, bu qurumların bir çoxu silahlı qanada malikdir və indiyədək ayrı-ayrı şəkildə fəaliyyət göstəriblər. Yeni format isə siyasi və təşkilati koordinasiyanın gücləndirilməsinə yönəlib.
Koalisiyanın əsas hədəfləri kimi İran İslam Respublikasının devrilməsi, kürdlərin öz müqəddəratını təyin etmək hüququnun beynəlxalq səviyyədə təşviqi və İran Kürdüstanında demokratik siyasi sistemin qurulması göstərilir.
Məlumata görə, sözügedən təşkilatların əksəriyyəti hazırda İraqın Kürdistan bölgəsində yerləşir və fəaliyyətlərini əsasən həmin ərazidən koordinasiya edirlər. Alyans nümayəndələri bu addımı siyasi birliyin möhkəmləndirilməsi və ortaq strategiyanın formalaşdırılması baxımından mühüm mərhələ kimi qiymətləndirirlər.
Tehran isə bu cür təşəbbüsləri ölkənin suverenliyi və ərazi bütövlüyünə təhdid hesab edir. İran rəsmiləri əvvəllər də sərhəd bölgələrində fəaliyyət göstərən silahlı kürd qruplaşmalarına qarşı hərbi əməliyyatlar həyata keçirib və onları xarici dəstək almaqda ittiham edib.
Ekspertlərin fikrincə, regionda artan geosiyasi gərginlik fonunda bu cür koalisiyaların yaranması İranın daxili təhlükəsizlik siyasətinə və sərhəd bölgələrindəki sabitliyə təsir göstərə bilər.
