İranda islahatçı siyasi düşərgəyə qarşı təhlükəsizlik əməliyyatları davam edir. İran mediasında yayılan məlumatlara görə, islahatçı siyasətçilərdən Milli Birlik Partiyasının Mərkəzi İdarə Heyətinin üzvü Əli Şekuri Rad və müxalif liderlərdən Mehdi Kerrubinin oğlu Hüseyn Kerrubi barələrində təxirə salınmış cəzaların apellyasiya məhkəməsi tərəfindən qüvvədə saxlanılmasından sonra həbs olunublar. Eyni zamanda İslahat Cəbhəsinin sözçüsü Cavad Emam da təhlükəsizlik qüvvələri tərəfindən saxlanılıb.
Məlumatlara əsasən, islahatçılara qarşı gözaltı və həbslərin intensivləşməsi Əli Şekuri Radın etiraz aksiyaları ilə bağlı sızdırıldığı iddia edilən səs yazısından sonra baş verib. Həmin səs yazısında Şekuri Radın İran hakimiyyətinin nümayişlər zamanı baş verən sabotaj aktları və qətllərdən təzyiq aləti kimi istifadə etdiyini, bu iddiaları əsas gətirərək etirazçılara qarşı sərt müdaxilələr həyata keçirdiyini söylədiyi bildirilir.
Bundan bir gün əvvəl İslahat Cəbhəsinin sədri Azər Mənsuri, Siyasi Komitənin rəhbəri İbrahim Əsgərzadə və sabiq prezident Məhəmməd Xatəminin hökumətində xarici işlər nazirinin müavini vəzifəsində çalışmış Möhsün Eminzadə də İnqilab Keşikçiləri Korpusu tərəfindən “konstitusiyaya zidd mövqe” ittihamı ilə saxlanılmışdı. İranın islahatçı partiyaları arasında mühüm mövqeyə malik olan İslahat Cəbhəsi son prezident seçkilərində Məsud Pezeşkianı dəstəkləmişdi.
