İranda xarici işlər naziri Abbas Araqçi ətrafında daxili siyasi gərginliyin artdığı bildirilir. “Iran International” iki məlumatlı mənbəyə istinadən yazır ki, Prezident Məsud Pezeşkian və parlament sədri Məhəmməd Baqer Qalibaf Araqçinin vəzifədən uzaqlaşdırılmasını istəyirlər. İddiaya görə, narazılığın əsas səbəbi xarici işlər nazirinin ABŞ ilə danışıqlar prosesində prezident administrasiyası ilə deyil, daha çox İslam İnqilabı Keşikçiləri Korpusu — SEPAH xətti ilə koordinasiyada hərəkət etməsidir.
Mənbələrin iddiasına əsasən, Pezeşkian və Qalibaf Araqçinin hökumət siyasətini icra edən nazir kimi deyil, SEPAH rəhbərliyinin göstərişlərini yerinə yetirən fiqur kimi davrandığını düşünürlər. “Iran International” yazır ki, Pezeşkian yaxın çevrəsinə bu vəziyyət davam edərsə, Araqçini vəzifədən azad edəcəyini deyib.
Məsələ ABŞ-İran danışıqlarının dalana dirəndiyi və Tehran daxilində danışıqların formatı ilə bağlı fikir ayrılıqlarının artdığı dövrə təsadüf edir. “The Guardian” yazır ki, tərəflər nüvə proqramı, Hörmüz boğazı və regional təhlükəsizlik məsələlərində güzəştə getməkdən imtina etdiyi üçün sülh səylərində ciddi irəliləyiş yoxdur.
Bu qalmaqal yalnız bir nazirin taleyi ilə bağlı deyil. Hadisə İran daxilində daha böyük sualı gündəmə gətirir: ölkənin xarici siyasət kursunu kim müəyyən edir — seçilmiş siyasi rəhbərlik, yoxsa təhlükəsizlik və hərbi strukturlar? “Reuters”-in təhlilinə görə, son hərbi-siyasi böhran fonunda SEPAH və təhlükəsizlik elitasının İranın qərarvermə mexanizmlərində təsiri ciddi şəkildə artıb.
Araqçi ətrafında yaranan gərginlik İran hakimiyyətindəki mülki və hərbi qanadlar arasında təsir mübarizəsinin açıq əlaməti kimi qiymətləndirilir. Rəsmi Tehran hələlik bu iddialarla bağlı təsdiqləyici açıqlama verməyib.
