İranın Yəzd şəhəri yaxınlığında yerləşdiyi bildirilən yeraltı “raket şəhəri” yenidən beynəlxalq diqqət mərkəzinə çıxıb.
“Reuters” martın əvvəlində yazırdı ki, İsrailin hərbi kampaniyasının ikinci mərhələsində hədəflərdən biri məhz, dərin yeraltı ballistik raket obyektləri idi və Yəzd bölgəsindəki raket bazası da zərbəyə məruz qalan məntəqələr sırasında göstərilib.
Bu obyektlə bağlı dövriyyədə olan əsas iddialardan biri onun qranit dağın daxilində çox böyük dərinlikdə yerləşməsidir. Açıq mənbələrdə bu rəqəm bəzən 440 metr, bəzən isə 500 metrə yaxın göstərilir.
Bununla belə, İranın yeraltı raket komplekslərinin çox dərin və çoxqatlı tunel sistemi ilə qurulduğu barədə daha ümumi qiymətləndirmələr geniş yayılıb. İranın raket obyektlərinin dağların içində, tunel girişləri və qorunan yeraltı infrastruktura söykənən model əsasında qurulduğu vurğulanır. Bəzi son təhlillərdə Yəzd kompleksində daxili tunel şəbəkəsi və logistik hərəkət üçün rels sistemi olduğu da iddia olunur, amma bu detal hələlik əsas agentliklər tərəfindən ayrıca müstəqil texniki sübutla təsdiqlənməyib.
Müqayisə üçün tez-tez ABŞ-ın ən güclü bunkerdələn bombası sayılan “GBU-57 Massive Ordnance Penetrator” xatırladılır. Açıq mənbələrdə bu sursatın təxminən 60 metr möhkəmləndirilmiş beton və ya daha dərin torpaq qatını yarmaq imkanından danışılır. Bu səbəbdən Yəzd kimi çox dərin yeraltı obyektlər barədə yayılan məlumatlar onların birbaşa məhv edilməsinin niyə çətin hesab olunduğunu izah etmək üçün istifadə olunur. Amma burada da vacib fərq var: bombanın nəzəri nüfuzetmə göstəricisi ilə konkret dağ geologiyası və kompleksin real quruluşu eyni şey deyil.
