İran mətbuatında yayılan xəbərlərə görə, ölkənin tanınmış siyasi fiqurlarından biri olan Əli Laricani həyatını itirib.
Məlumatlara əsasən, Laricani İsrailin həyata keçirdiyi hava hücumu nəticəsində öldürülüb. İran tərəfi də bir müddət sonra onun ölümünü təsdiqləyib.
Şahidlərin sözlərinə görə, İranın Ali Milli Təhlükəsizlik Şurasının katibi və onun yaxın çevrəsinin olduğu bina gecə saat 03:00 radələrində zərbəyə məruz qalıb və tamamilə dağıdılıb. Bildirilir ki, Əli Laricani Tehranın şimal-şərqində yerləşən, təxminən 17-20 km məsafədə olan Pərdis şəhərində qızının evində öldürülüb.
Uzun illər İran siyasətində mühüm rol oynayan Laricani son dövrlərdə milli təhlükəsizlik məsələlərində əsas fiqurlardan biri idi və ölkədə ən təsirli şəxslərdən biri hesab olunurdu.
Qeyd edək ki, o, daha əvvəl İran parlamentinin sədri, mədəniyyət naziri və Ali Milli Təhlükəsizlik Şurasının katibi kimi yüksək vəzifələrdə çalışıb.
Bəzi ilkin məlumatlarda onun ölümünün təsdiqlənməsi ilə bağlı ziddiyyətli xəbərlər yayılsa da, son məlumatlar İran tərəfindən rəsmi təsdiqin verildiyini göstərir.
Ekspertlərin fikrincə, Laricaninin ölümü regionda davam edən gərginlik fonunda İranın siyasi və təhlükəsizlik sisteminə ciddi təsir göstərə bilər.
