İran Livandakı “Hizbullah” hərəkatına yaxın zamanda yeni regional hərbi qarşıdurmanın başlaya biləcəyi barədə xəbərdarlıq edərək döyüş hazırlığı səviyyəsini artırmağı tapşırıb.
MSNews.az xəbər verir ki, bu barədə İsrailin “Channel 12” (N12) telekanalı Livanın təhlükəsizlik mənbələrinə istinadla məlumat yayıb. Xəbərin ilkin mənbələrindən biri Birləşmiş Ərəb Əmirliklərinin “Erem News” portalıdır.
“The Jerusalem Post” nəşrinin iki diplomatik mənbəyə istinadən yaydığı məlumatda da İranın “Hizbullah”a ABŞ hücumlarının yenidən başlaya biləcəyi barədə xəbərdarlıq etdiyi qeyd olunur.
İtaliyanın “ANSA” agentliyi də bu məlumatları yayıb. Agentlik qeyd edib ki, son illərdə İsraillə qarşıdurmalarda ciddi itkilər verən “Hizbullah”ın əvvəlki hərbi imkanlarını tam bərpa etdiyini göstərən əlamətlər yoxdur.
Qeyd edək ki, İranın “Hizbullah”a yeni müharibəyə hazırlıq barədə göstəriş verməsi haqqında məlumatlar hələlik anonim mənbələrə əsaslanır. Tehran və “Hizbullah” rəhbərliyi bu iddiaları rəsmi şəkildə təsdiqləməyib.
