Londonda Müqəddəs Pavel Kafedralında keçirilən qədim və simvolik mərasimdə Sara Mallalli (Sarah Mullally) rəsmi şəkildə İngiltərə Kilsəsinin tarixində ilk qadın Kenterberi arxiyepiskopu kimi təsdiqlənib.
“Seçimin Təsdiqi” adlanan bu ənənəvi mərasim kafedralın məhkəmə zalına çevrildiyi hüquqi-dini prosedur çərçivəsində baş tutub və arxiyepiskop-seçilənin vəzifəni qanuni olaraq icra etməyə başladığı anı rəsmiləşdirib.
Oktyabrda bu vəzifəyə təyin edilən 63 yaşlı Mallalli mərasim zamanı Böyük Britaniya kralı III Çarlzın səlahiyyəti ilə çıxış edən yüksək rütbəli yepiskopların – Kral Komissarlarının qarşısında and içərək Kenterberi arxiyepiskoplarının 106-cısı olub.
O, eyni zamanda 165 ölkədə təxminən 85 milyon mömini birləşdirən qlobal Anqlikan Birliyinin ruhani lideri funksiyasını da icra edəcək.
XVI əsrdə VIII Henrinin Roma Katolik Kilsəsindən ayrılmasından bəri Britaniya monarxı İngiltərə Kilsəsinin ali himayədarı hesab olunur. Mallalli yazılı bəyanatında dünyanın parçalanma və qeyri-müəyyənliklə üzləşdiyi bir dövrdə dialoq, paylaşım və “qonaqpərvərlik xidməti”nə sadiq qalacağını vurğulayıb, eyni zamanda kilsənin keçmişdəki qoruyucu mexanizmlərlə bağlı nöqsanları fonunda zorakılıq qurbanlarının və səsi eşidilməyənlərin daim diqqətdə saxlanılacağına söz verib.
Mərasimdə İngiltərə Kilsəsinin və Anqlikan Birliyinin geniş coğrafiyasını əks etdirən ruhani və icma nümayəndələri, məktəblilər və xor kollektivləri iştirak edib, proqramda Edvard Elqarın əsərindən tutmuş Cənubi Afrikaya məxsus xosa dilində ifalara, eləcə də, ingilis və portuqal dillərində oxunuşlara yer verilib.
Keçmişdə İngiltərənin baş tibb bacısı olmuş Mallalli mart ayında Kenterberi Kafedralında taxta çıxarılacaq və həmin mərasimlə onun ictimai ruhani fəaliyyəti rəsmi olaraq başlanacaq; təyinatı isə qadınların ruhani vəzifələrə təyin olunmasına qarşı çıxan bəzi mühafizəkar anqlikan dairələrində tənqidlərə səbəb olub.
