Azərbaycan Prezidenti İlham Əliyev martın 23-də Şamaxı rayonuna səfəri çərçivəsində əvvəlcə şəhərin mərkəzində ucaldılmış Heydər Əliyevin abidəsini ziyarət edib, daha sonra isə “Şirvan Aqro” heyvandarlıq kompleksinin açılışında iştirak edib. Kompleksin 100 hektara yaxın ərazini əhatə etdiyi, 9 min baş heyvan üçün nəzərdə tutulduğu və 200-dən çox şəxsin işlə təmin olunduğu bildirilib.
Şamaxı Rayon İcra Hakimiyyətinin başçısı Tahir Məmmədov dövlət başçısına müəssisə barədə məlumat verib. Qeyd olunub ki, 100 hektara yaxın ərazini əhatə edən kompleksin yaradılmasında əsas məqsəd əhalinin yüksəkkeyfiyyətli süd və ət məhsulları ilə təmin olunmasına, bu məhsulların ixracına, eləcə də regionda, xüsusilə Şamaxı və ətraf rayonlarda məşğulluğun artırılmasına töhfə verməkdir.
Bildirilib ki, kompleksdə 9 min baş heyvanın, o cümlədən 3200 baş südlük, 3000 baş ətlik mal-qaranın və 2800 baş buzovun saxlanılması üçün şərait yaradılıb. Müəssisədə Holşteyn-Friz, Limuzin, Aberdin-Anqus və digər cinslərdən heyvanlar saxlanılır. Ən son texnologiyalarla təchiz edilən və süni intellekt vasitələri ilə idarə olunan kompleksin Qafqaz regionunda və MDB məkanında ən böyük heyvandarlıq müəssisələrindən biri olduğu vurğulanıb.
Kompleksin ölkədə alternativ və yaşıl enerjidən istifadə edən ilk heyvandarlıq kompleksi olduğu, burada yüksəkixtisaslı mütəxəssislərin hazırlanması üçün Təlim-Tədris Mərkəzinin də fəaliyyət göstərəcəyi qeyd edilib. Müəssisədə Azərbaycanın və Cənubi Qafqazın ən böyük “Karusel” tipli süd sağımı, eləcə də “Paralel” sağım sistemləri qurulub. Südün sürətli soyudulması, reproduksiya, sürü idarəetməsi və heyvanların sağlamlıq vəziyyətinin izlənilməsi üçün müasir sistemlər tətbiq olunur.
Müəssisədə, həmçinin innovativ avadanlıqlarla təchiz olunmuş yem mərkəzi və “Dry Age” otağına malik ət kəsimi məntəqəsi yaradılıb. Kompleksdə Şamaxı və ətraf rayonların 200-dən çox sakini işlə təmin olunub. Burada digər rayonlardan gələn əməkdaşlar və xarici mütəxəssislər üçün yaşayış binası da inşa edilib.
Sonra Prezident İlham Əliyev müəssisənin əməkdaşları ilə görüşüb. Dövlət başçısı çıxışında bildirib ki, bu müəssisə həm Şamaxının, həm də bütövlükdə Azərbaycanın kənd təsərrüfatının inkişafı üçün böyük əhəmiyyət daşıyır. Prezident qeyd edib ki, belə komplekslərin yaradılması ölkənin ət, süd və süd məhsulları ilə özünütəminat səviyyəsinin yüksəlməsinə, gələcəkdə isə ixrac imkanlarının artmasına xidmət edəcək. O, eyni zamanda vurğulayıb ki, müəssisə Şamaxıda məşğulluğun artırılmasına da mühüm töhfə verəcək.
Prezident İlham Əliyev çıxışında Şamaxıda son illərdə görülən işlərə də toxunaraq rayonun turizm mərkəzlərindən birinə çevrildiyini, yol və infrastruktur layihələrinin bölgənin inkişafına yeni imkanlar yaratdığını bildirib. Dövlət başçısı bu cür müəssisələrin istifadəyə verilməsinin həm ərzaq təhlükəsizliyi, həm də regionun kənd təsərrüfatı potensialının gücləndirilməsi baxımından xüsusi əhəmiyyət daşıdığını vurğulayıb.
