Norveç millisi 2026-cı il dünya çempionatının 1/16 final mərhələsində Kot-d’İvuarı 2:1 hesabı ilə məğlub edib.
MSNews.az xəbər verir ki, Arlinqtondakı “Dallas Stadium”-da keçirilən qarşılaşma gərgin və baxımlı oyunla yadda qalıb.
Norveçin qələbə qolunu 86-cı dəqiqədə Erlinq Holand vurub. Bu qol onun turnirdə beşinci qolu olub.
Oyunda hesab 39-cu dəqiqədə açılıb. Antonio Nusa sol cinahdan cərimə meydançasına daxil olaraq möhtəşəm zərbə ilə topu uzaq küncə göndərib və Norveçi önə keçirib.
Kot-d’İvuar ilk hissədə bir neçə təhlükəli epizod yaratsa da, fasiləyə hesabda geridə yollanıb. Afrika təmsilçisi ikinci hissədə təzyiqi artırıb və 74-cü dəqiqədə istəyinə çatıb. Amad Diallo sağ cinahdan cərimə meydançasına daxil olub, rəqiblərini keçərək dəqiq zərbə ilə hesabı bərabərləşdirib.
Bərabərlikdən sonra oyun daha da açılıb. Hər iki komanda əsas vaxtda qələbə qolunu vurmağa çalışıb. Kot-d’İvuarın hücumları təhlükəli olsa da, Norveç həlledici anda daha soyuqqanlı oynayıb.
86-cı dəqiqədə Oskar Bobbun başladığı hücumdan sonra Patrik Berq topu aşağıdan cərimə meydançasına ötürüb. Holann yaxın məsafədən fərqlənərək Norveçi yenidən önə keçirib.
Bu qol oyunun taleyini həll edib. Kot-d’İvuar əlavə vaxtda təzyiq göstərsə də, Norveç müdafiəsi nəticəni qorumağı bacarıb.
Qarşılaşmanın son dəqiqələrində Amad Diallonun uzaq məsafədən vurduğu təhlükəli cərimə zərbəsini Norveç qapıçısı Öryan Nayland dəf edib. Bu epizod Kot-d’İvuarın oyunu əlavə vaxta aparmaq üçün son real şansı olub.
Norveç 2:1 hesablı qələbə ilə 1/8 finala yüksəlib. Komanda növbəti mərhələdə Braziliya ilə qarşılaşacaq.
Kot-d’İvuar isə turniri tərk edib. Buna baxmayaraq, komanda xüsusilə hücum futbolu və Amad Diallonun təsirli oyunu ilə mundialda yadda qalıb.
