Peruda Hitler Mussolini Simeon Flores adlı siyasətçi Huanuko departamentinin Queropalka rayonunda keçirilən bələdiyyə seçkisində birinci olub. O, 229 səs — etibarlı səslərin 34,54 faizini toplayıb.
MSNews.az xəbər verir ki, Flores mərkəz-sol xəttə malik “Ahora Nación” partiyasının namizədi kimi seçkidə iştirak edib. Onun əsas rəqibi Gaspar Benilde Osorio Zambrano 204 səs — 30,8 faiz toplayıb. Beləliklə, fərq cəmi 25 səs olub.
“Euronews” yazır ki, Queropalka 730-dan bir qədər çox əhalisi olan kiçik And rayonudur. Flores hazırda seçkinin virtual qalibi sayılır.
Perunun Milli Seçki Münsifliyinə təqdim edilən sənədlərə görə, Hitler Mussolini Simeon Flores 6 avqust 1981-ci ildə Queropalka şəhərində doğulub. Onun seçki dosyesində orta təhsili başa vurduğu, lakin ali təhsil barədə məlumatın göstərilmədiyi qeyd olunur. O, 2023–2026-cı illərdə “Grupo de Inversiones Simeon SAC” şirkətində menecer kimi çalışdığını bəyan edib.
Siyasətçi daha əvvəl sağçı “Fuerza Popular” partiyasının üzvü olub, 2025-ci ildə həmin partiyadan ayrılıb və 2026-cı il seçkilərində “Ahora Nación” ilə yarışıb.
Floresin adı Adolf Hitler və Benito Mussolininin adları ilə üst-üstə düşdüyü üçün seçki nəticəsi beynəlxalq mediada geniş diqqət çəkib. Lakin onun bu adın mənşəyi barədə dedikləri ilə bağlı mənbələrdə ziddiyyət var: bəzi xəbərlər adın valideynləri tərəfindən verildiyini yazır, digər mənbələr isə bunu təsdiqləyən rəsmi məlumatın olmadığını bildirir.
Bu, Peruda qeyri-adi adı ilə diqqət çəkən ilk siyasətçi deyil. 2018-ci ildə Hitler Alba Sançes adlı başqa bir siyasətçi də bələdiyyə seçkisində qalib gəlmişdi.
