“Barselona”nın baş məşqçisi Hansi Flikin atası vəfat edib. Kataloniya klubu bazar günü yaydığı açıqlamada alman mütəxəssisə və ailəsinə başsağlığı verib. Klub bildirib ki, bütün “Barselona” ailəsi bu çətin anda Flikin kədərini bölüşür.
Kədərli xəbər “Barselona” – “Real Madrid” “El-Klasiko”sundan bir neçə saat əvvəl açıqlanıb. “La Vanguardia” yazır ki, Hansi Flik xəbəri komandanın matç öncəsi toplaşdığı oteldə futbolçulara çatdırıb. Buna baxmayaraq, onun bu axşam “Real Madrid”lə qarşılaşmada ehtiyat oyunçular skamyasında olması gözlənilir.
Məlumata görə, “Barselona” futbolçuları Flikin atasının xatirəsinə qara sarğı ilə oynamaq və matçdan əvvəl bir dəqiqəlik sükut saxlamaq istəyiblər. Klub daxilində komandanın bu oyunda qələbəni baş məşqçiyə həsr etmək istədiyi bildirilir.
“GOAL”-un məlumatına görə, Flik “El-Klasiko”dan sonra ailəsinin yanında olmaq üçün Almaniyaya yollanacaq. “Barselona” hazırda La Liqada “Real Madrid”i 11 xal qabaqlayır və bu qarşılaşmada məğlub olmasa, çempionluğu rəsmiləşdirə bilər.
“Real Madrid” də Hansi Flikə başsağlığı verib. Madrid klubunun açıqlamasında Flikin atasının vəfatından dərin kədər hissi keçirildiyi, məşqçiyə və ailəsinə başsağlığı ifadə olunduğu bildirilib.
