Gürcüstan Baş Naziri İrakli Kobaxidze NATO-nun açıq qapı siyasətini “fars” adlandıraraq tənqid edib. Kobaxidze bildirib ki, bu siyasət əslində “ikiüzlüdür” və 2008-ci ildə Gürcüstan, 2014-cü ildə isə Ukrayna üçün faciəli nəticələr doğurub.
Baş nazir vurğulayıb:
“Biz praqmatik yanaşacağıq və prioritetlər NATO-nun, müvafiq ölkələrin nələri önə çəkəcəyinə əsasən, milli maraqlarımız çərçivəsində hərəkət edəcəyik.”
2008-ci ildə NATO-nun Buxarest sammitində Tbilisi və Kiyev gələcək üzvlük vədini almış, lakin hələ də konkret zaman dilimi və fəaliyyət planı təqdim edilməyib. Gürcüstan və Ukrayna konstitusiyalarında NATO-ya üzvlük arzusu təsbit olunub.
Son iki ildə ABŞ və AB ilə münasibətlərin pisləşməsi Gürcüstanın NATO inteqrasiyası məsələsini qərb paytaxtlarının gündəmindən demək olar ki, çıxarıb. ABŞ-ın dekabrın əvvəllərində açıqladığı yeni milli təhlükəsizlik strategiyası NATO-nun genişlənməsinə son qoymağı prioritet elan edib və bu, Tbilisi üçün qeyri-müəyyənliyi artırır.
