Fransada lisey şagirdlərinin günlərdir davam edən etirazları kəskinləşib. Ölkənin müxtəlif şəhərlərində məktəblərin bloklanması yanğınlar, dağıntılar və polislə toqquşmalarla müşayiət olunub. Baş nazir Sebastyen Lekornü vəziyyətlə əlaqədar hökumətlərarası böhran müşavirəsi keçirib.
MSNews.az xəbər verir ki, oktyabrın 1-də etiraz aksiyaları ölkə üzrə 1027 təhsil müəssisəsini əhatə edib, onlardan 222-si bloklanıb. Fransa hökuməti vəziyyətin bəzi ərazilərdə adi şagird etirazlarından “şəhər zorakılığı” mərhələsinə keçdiyini bildirir.
Etirazlar müəllim çatışmazlığı, siniflərin həddindən artıq yüklənməsi və məktəb infrastrukturunun vəziyyəti ilə bağlı narazılıqlardan başlayıb. Hərəkat Paris regionundan ölkənin digər şəhərlərinə yayılıb.
Sen-Denidə şagird və tələbələrin iştirakı ilə keçirilən aksiyada polislə gərginlik yaşanıb. “Le Monde”un məlumatına görə, nümayişçilər tərəfindən pirotexniki vasitələrdən istifadə olunub, polis isə gözyaşardıcı qaz tətbiq edib. Le Monde.fr
Nantda məktəblərdən birinə yanğın nəticəsində ziyan dəyib. Paris, Strasburq, Marsel, Tuluza və digər şəhərlərdə də yanğınlar, dağıntılar və polislə qarşıdurmalar qeydə alınıb.
İlkin xəbərlərdə günün birinci yarısında təxminən 500 nəfərin saxlanıldığı bildirilsə də, Fransa Daxili İşlər Nazirliyinin yekun göstəricisinə əsasən, cümə axşamı ölkə üzrə 1 949 nəfər saxlanılıb. Həmçinin 305 polis, jandarm və yanğınsöndürənin yaralandığı açıqlanıb.
Hökumət etirazların zorakı hissəsinin radikal sol qruplar tərəfindən təşviq edildiyini iddia edir və xüsusilə “La France Insoumise” (LFI) ilə əlaqəli şəxsləri ittiham edir. LFI isə bu iddiaları rədd edərək hökuməti polis müdaxilələri ilə gərginliyi artırmaqda günahlandırır.
Vəziyyətlə əlaqədar oktyabrın 2-də ölkə üzrə təxminən 400 liseyin bağlı qalması nəzərdə tutulub.
